Хаҥалас улууһун Өктөм сэлиэнньэтигэр 220 миэстэлээх оскуола уонна ону тэҥэ холбуу 100 миэстэлээх оҕо уһуйаана тутуллан бүтэн эрэр. Өрөспүүбүлүкэ вице-премьерэ Сергей Местников тутуу үлэтин хаамыытын билистэ уонна маннык эбийиэк тыа сиригэр холобур буолуохтааҕын бэлиэтээтэ. Ол туһунан «Саха» НКИХ иһитиннэрэр.
Оскуола-уһуйаан саҥа дьиэтин тутуу 2019 сылга саҕаламмыта. Тутуу «Үөрэхтээһин» национальнай бырайыак чэрчитинэн барар, генеральнай бэдэрээтчит «Сэттэ» тутуу хампаанньата буолар. Оскуола дириэктэрэ Калиста Афанасьева үлэ бүппүтүн, билигин сүнньүнэн тупсарыы, ону тэҥэ миэбэл таҥыытын үлэлэрэ хаалбыттарын эттэ. Оскуола естественнэй-научнай хайысхаҕа тирэҕирэрэ былааннанар.
«Тутууга оскуола выпускниктара эмиэ, 40-ча киһи кытынна. Эргэ оскуола дьиэтин оннугар газоҥҥа миэстэ таһаарбыппыт уонна сквер оҥорорго былаанныыбыт. Балаҕан ыйын 1 күнүн кэнниттэн урукку сыллар выпускниктарын мас олордуутугар ыҥырыахпыт. Бу биһиги кырдьаҕас оскуолабыт өйдөбүнньүгэ буолуо», — диэтэ дириэктэр.
Саха сирин бырабыыталыстыбатын бэрэссэдээтэлин солбуйааччыта Сергей Местников СӨ үөрэҕин министиэристибэтин кытта үлэ хаамыытын бэрэбиэркэлээтэ. Кини үөрэх эбийиэгин тутуу үрдүк тэрээһиннээҕин уонна хаачыстыбатын бэлиэтээтэ.
«Бүгүн үлэ барыта түмүктэнэн эрэр. Хампаанньа эбийиэги хаачыстыбалаахтык туппутугар бэдэрээтчиттэр кылааттарын бэлиэтиэххэ наада. Бу эбийиэккэ оскуола выпускниктара үлэлииллэр. Бырайыак уһулуччулаах буолара көстөр. Бу өрөспүүбүлүкэҕэ эрэ буолбакка, Россияҕа да, тыа сиригэр оскуола хайдах буолуохтааҕын, үөрэх эбийиэктэригэр тутуу үлэтин тэрийиигэ холобур буолуоҕа дии саныыбын», — диэтэ Местников.