Бүгүн, балаҕан ыйын 8 күнүгэр, Саха тыйаатырыгар үөрүүлээх түгэн буолла. Бу күн Саха тыйаатырын саҥа кэрдиис кэмэ тосхойон, саҥа салайааччытынан Пётр Тимофеевич Макаров ананна.
Саалаҕа мустубут дьон бу үөрүүлээх сонуну дохсун ытыс тыаһынан айхаллыы-уруйдуу көрүстэ. 
Ил Дархан уонна СӨ бырабыытылыстыбатын администрациятын салайааччыта Афанасий Владимиров: «Петр Макаров М.С.Щепкин аатынан Үрдүкү театральнай училищены бүтэриэҕиттэн бу кэллэктиипкэ артыыстан дириэктэр солбуйааччытыгар тиийэ үүннэ. Тыйаатыр уонна киинэ артыыһын быһыытынан бэйэтин суолун торунна. «Тыгын Дархан» киинэҕэ биир сүрүн оруолу толорбута», -диэн билиһиннэрдэ.
СӨ судаарыстыбаннай сүбэһитэ Андрей Борисов кэс тылы этэн, баҕа санаатын үллэhиннэ . Кини Саха тыйаатыра биир улахан дьиэ кэргэн буоларын тоһоҕолоон эттэ, саҥа салайааччы уруккуттан олохтоммут үгэстэри тутуһарыгар, салайар тэрилтэтин өссө сайыннарарыгар баҕа санаатын тиэртэ. Тыйаатыр айар кыаҕа арылларыгар артыыстан үүммүт салайааччылар төһүү күүс буолалларын санатта. Уонна Арктика тиэмэтигэр болҕомтону уурарыгар сүбэлээтэ. 
Саҥа дириэктэргэ тыйаатыр устаабын уонна бэлиэтин, былааҕы, үөрүүлээх быһыыга-майгыга туттардылар. Пётр Макаров харда тыла этэн, Саха Академическай тыйаатыр дириэктэринэн уһун кэмҥэ үлэлээбит Анатолий Николаевка 160 бриллианынан ойууламмыт хартыынатын бэлэх уунна.
Билигин Саха тыйаатыра саҥа кэрдиис кэмҥэ тахсар суолугар турда. Улахан өрөмүөн түмүктэнэн эрэр. Көрөөччүлэри Андрей Борисов, Руслан Тараховскай и Сергей Потапов режиссердаах саҥа испэктээхтэр күүтэллэр.
Ааптар: Валентина Суздалова.