Сэтинньи 10 күнүгэр С. З. Борисов аатынан Тыыллыма орто оскуолатын оҕолоругар Туора диэн күөлгэ муҥха буолан ааста. Муҥхаҕа аҕалар, эһэлэр, кылаас салайааччылара, оскуола эр дьон үлэһиттэрэ уонна 1 кылаастан саҕалаан 10 кылааска диэри оҕо аймах көхтөөх кыттыыны ыллылар.
Муҥхаҕа киириэх иннинэ, сиэр быһыытынан, олоҥхоһут, Саха Өрөспүүбүлүкэтин култууратын туйгуна, Дархан оһуокайдьыт, олоҥхоҕо Ил Дархан стипендиата, олоҥхо ыһыахтарын үс төгүллээх кылаан кыайыылааҕа, Гаврил Колесов аатынан анал үрүҥ көмүс бэлиэ хаһаайына, 6-с Норуоттар икки ардыларынааҕы “Игры кочевников” бэстибээлгэ эпостар куонкурустарын 3-с үктэллээх кыайыылааҕа Виталий Никифоров уот оттон Күөх Боллохтон көрдөһөн алҕаата. Эр дьоннор икки улахан чардааты анньыынан алларбыттара. Муҥха хаамыытын кылгастык кэпсиир буоллахха, маннык: анньыынан элбэх ойбону алларан муҥханы ыыппыттара. Хайысхалаах быа үтүмэҕинэн кыра ойбоннор устун муҥханы илдьэн испиттэрэ. Бүтэhик ойбонтон соболоох муҥханы таhаарбыттара. Муҥхабытын иккитэ тардыбыппыт. Бастакы сырыыга балык суоҕа, оттон иккис сырыыбытыгар баһаам балыгы таһаарбыттара. Балыгы муҥхаҕа үлэлээбит дьоҥҥо, оҕолорго барыларыгар тимир улахан күрдьэҕинэн Борисов Валентин Дмитриевич тэҥник үллэртээбитэ. Оҕолор уонна төрөппүттэр үөрүүлэрэ хас да төгүл үрдээн, махтанан барбыттара. Сорох оҕолорго бастакы муҥхалара этэ. Бары көхтөөхтүк үлэлээбиттэрэ, ким да туора турбатаҕа, халлааммыт да ичигэс этэ.
Дьячковский Борис, 6-с кылаас үөрэнээччитэ, маннык кэпсиир:
Мин 9 сааспыттан муҥхаҕа сылдьабын. Муҥхаҕа сылдьарга аҕам үөрэппитэ. Бэйэм тус анньыылаахпын. Аҕам Дьячковский Николай Дмитриевич куйуур күрэҕэр улуус уонна өрөспүүбүлүкэ чөмпүйүөнэ буолар. Мин аҕабынан киэн туттабын.
Аржаков Володя, 5 кылаас, муҥхаҕа бастакытын сылдьыбыт:
Хайдах муҥхалыылларын биллим. Балыгы хайдах үүрэллэрин көрдүм. Элбэх буолан сылдьар наһаа үчүгэй, көхтөөх. Биһиги кылааһынан бары кэлбиппит,
— диир.
Оттон 10-с кылаас үөрэнээччитэ Дайбанныыров Айтал муҥха олус бэhиэлэйдик, интэриэhинэйдик ааспытын, ойбон тэhиитигэр уонна муҥханы соhон таhаарарга көмөлөспүтүн кэпсээтэ.
Төрөппүт, оскуола техүлэһитэ Стручков Альберт Андреевич муҥха диэн сахаларга үгэс буолбут булт, кини бэйэтэ олус сөбүлүүр көрүҥэ буоларын эттэ уонна: “Оҕолор муҥхалыыллара олус үчүгэй, саҥаны билэллэрэ-көрөллөрө элбиир”, — диэн бэлиэтээтэ.
Бу тэрээhин биhиги оскуолабыт оҕолоругар саҥа санаалары, көрүүнү, интэриэhи тартын. Билиҥҥи үйэҕэ сахабыт төрүт угэстэрин билиэххэйиҥ!
Айыллаана БОРИСОВА, 10 кылаас үөрэнээччитэ,
Тыыллыма орто оскуолатын “Урсун” медиа-киинин кэрэспэдьиэнэ.
Хаартыскаҕа түһэрдэ: Лариса ПРОКОПЬЕВА, 10 кылаас үөрэнээччитэ.
Кэскил14.ру