Билиҥҥи үйэҕэ Интернет ситимэ сайдан,оҕолор ютуб ханаалынан киинэлэри, мультиктары көрөллөр, блогердар кэпсээннэрин, сүбэлэрин истэллэр.
Онтон мин араас киинэни, сериалы көрөрбүн сөбүлүүбүн. Бэйэм ордорон көрөр жанрдарбынан комедия, мелодрама, фантастика, детектив, историяны дьүһүйэр тиэмэлээхтэр уонна боевиктар буолаллар.
Комедия-киинэ көрүдьүөстэринэн киһи санаатын көнньүөрдэр буолан, дьиэ кэргэнинэн бары үөрэ-көтө көрөргө табыгастаахтар. Холобур: «Приключения Паддингтона», «Мы купили зоопарк», «Кролик Питер», «Элвин и бурундуки», «Один дома».
Мелодрамаҕа сүрүн хамсатар күүһүнэн таптал буолар. «Титаник», «Хатико», «Ромео и Джульетта», «В метре друг от друга» киһи уйулҕатын олус хамсатар, истиҥ-иһирэх иэйиини иҥэрэр киинэлэр буолаллар.
Историяны көрдөрөр сериалларга чопчу биир кэми, ол кэмҥэ буолбут түгэннэри-түбэлтэлэри уонна историяҕа улахан оруоллаах киһини личность быһыытынан көрдөрөллөр, кэпсииллэр. Билигин интэриэһиргээн көрө сылдьар сериалларым — «Великолепный век»,»Екатерина Великая».
Детектив-киинэлэргэ сурун геройдарынан полиция, ФБР үлэһиттэрэ, албакааттар буолаллар, буруйу силиэстийэлииллэр, өлөрүөхсүтү булаллар ( «Мыслить как преступник», «Шерлок Холмс», «Следствие по телу»).
Мин ордук сөбүлээн көрөр киинэлэрдээхпин. Холобур, «До встречи с тобой» киинэни элбэхтэ көрдүм да, син биир… ытыыбын. Олус долгутуулаах киинэ.
Уонна «Аватар» киинэ миигин олус умсугуппута. Бу фантастика киинэҕэ атын эйгэ туһунан кэпсэнэр. «Аватар» ханнык да киинэҕэ маарыннаабат туспа уратылаах…
Киинэттэн, син биир кинигэттэн курдук, киһи элбэххэ үөрэнэр, олох уопутун ылар.
Ааптар: Диана Аргунова, 11 кылаас. «Бэдьимэ кэскилэ» пост.
Мэҥэ-Хаҥалас.