Саха сирин маҥнайгы президенэ М.Е. Николаев көҕүлээһининэн, 2012 сыллаахтан, олоххо киирэн, өрөспүүбүлүкэ үгүс биэбэйиктэригэр, оскуолаларыгар тыыннаах музыка кэрэ эйгэтин үөскэтэр.
Быйылгы үөрэх үлэһиттэрин сүбэ мунньаҕын чэрчитинэн С.Ф. Гоголев аатынан Дьокуускайдааҕы педагогическай колледж музыка учууталларыгар, уһуйааччыларга онлайн-вебинар тэрийдэ.
“Музыка – барыбытыгар” бырайыак үлэлиэҕиттэн оскуола оҕолоругар аналлаах оройуоннар истэригэр 1403 араас халыыптаах тэрээһиннэри, куонкурустары ыытта, манна 16744 оҕо кытынна. Өрөспүүбүлүкэ таһымнаах тэрээһиннэр — 634, оҕо кыттыыта — 5748. Бүттүүн Россия уонна аан дойду таһымнаах куонкурустарга 974 оҕо кыттыбыт.
2019-2020 үөрэх дьылыгар бырайыак көрдөрүүтэ олус үчүгэй. Музыка учууталлара үөрэнээччилэри кыра саастарыттан исскуствоҕа, кэрэҕэ сыһыараллар, баай дууһалаах дьон буолан тахсалларыгар кыһаллаллар.
Быйылгы үөрэх дьылын улахан аҥаара кэтэхтэн буолан, музыка уруогар электроннай үөрэнэр кинигэ суоҕа кыһалҕаны үөскэппитин учууталлар бэлиэтээтилэр.
2020-2021 сс. “Музыка – барыбытыгар” бырайыак оҕолорго аныгы технологиялары туһана үөрэнэллэригэр, электроннай эйгэҕэ киэҥник хардыылаан киирэллэригэр үлэлэһиэ.
Айыына Трофимова