Оҕо олоҥхону үөрэтэригэр уһун тиэкиһи өйүгэр тутара, сахалыы толкуйа, саҥатын сааһылыыр дьоҕура сайдар. Оттон олоҥхону үөрэтиигэ педагог норуот тылынан уус-уран айымньытын өйдүүрэ, оҕоҕо тиэрдэр сатабыла ирдэнэр. Маныаха уһуйаан иитээччилэрэ урукку олоҥхоһуттар устан хаалларбыт тыыннаах толорууларын хото туһаналлар.
Билигин үөрэх тэрилтэлэрэ бары тэйиччиттэн олорон оҕону үөрэтиигэ көстүлэр. Ол эрээри Интернет ситимэ мөлтөҕө, үөрэх цифровой былаһааккалара ситэтэ-хотото суохтара улахан мэһэйи үөскэттилэр.
«Оҕолору кытта үлэлиир уһуйааччылар оҕо барахсан чаҕыл хараҕынан көрөн, чуор кулгааҕынан истэн ылынарын бары бэркэ билэбит. Чуолаан олоҥхо ырыатын толорууга, тус-туһунан дьоруойдарын айылгыларын тиэрдэр гына ааҕарга үөрэтиигэ оҕо илэ көрдөҕүнэ, иһиттэҕинэ эрэ ситиһиллэр. Билигин оҕолорбутун ыраахтан олорон үөрэтэрбитигэр хас дьиэ ахсын куйаар ситимэ суох, оскуола сорудаҕыттан ордон «zoom» ситимигэр тахсыбаппыт. Онон бу курдук видео оҥорон оҕолорбутугар ватсап нөҥүө ыытан иһитиннэрэр, көрдөрөр тоҕоостоох эбит диэн санааттан бу видеоматырыйаалы телефоммунан оҥордум. Видеоны ватсабынан ыытан көрдөрөн баран оҕоҕо аахтарар ордук өйдөнүмтүө буолуо» — диэн кэпсиир Хатастааҕы «Кэрэчээнэ» оҕо саадын уонна «Ситим» айымньы дьиэтин уһуйааччыта Вера Старкова, СӨ култууратын туйгуна, үтүөлээх үлэһитэ.
Олоҥхо дьоруойдарын ырыаларын бу сыылкаларынан киирэн иһит:
https://www.instagram.com/p/B-wlI2GJuVy/
https://www.instagram.com/p/B-wlQopJXbu/
https://www.instagram.com/p/B-wldpNJQDc/
https://www.instagram.com/p/B-wlkG9JUyI/
https://www.instagram.com/p/B-wlpwhp5y2/
Вера Никитична «Кэрэчээнэ» оҕо саадыгар оскуола иннинэ саастаах оҕолору, «Ситим» айымньы дьиэтигэр оскуола оҕолорун олоҥхоҕо, саха фольклоругар (чуолаан чабырҕахха), театральнай куруһуокка дьарыктыыр.
Ааптар: Татьяна Жиркова