Сэтинньи ый 12 күнүгэр оскуолабытыгар саха оҕотун төрүт үгэскэ, үлэҕэ уонна төрөөбүт литэрэтиирэҕэ сыһыарар икки бэртээхэй тэрээһин буолан ааста.
Ол курдук, улахан кылаас уолаттара саха төрүт үгэһин утумнаан, идэһэ өлөрүү сиэригэр-туомугар кытыннылар. Манна уолаттар эр киһи төрүт дьарыгар уһуйуллан, аҕа көлүөнэ дьонтон, учууталларыттан үгүс саҥаны биллилэр-көрдүлэр, тыа сирин олоҕун-дьаһаҕын ис кистэлэҥэр сыһыннылар. Маннык тэрээһиннэр уол оҕо үлэҕэ эриллэн тахсарыгар, сахалыы толкуйдаах, мындыр буоларыгар олук уураллар.
Оттон 5-с кылаас үөрэнээччилэрэ оскуолабыт иһинээҕи бибилэтиэкэҕэ саха литэрэтиирэтин төрүттээччи, улуу суруйааччы уонна государственнай деятель Платон Алексеевич Ойуунускайга аналлаах тэрээһиҥҥэ сырыттылар. Бу тэрээһин Платон Алексеевич Ойуунускай төрөөбүт күнүгэр анаан оҥоһулунна. Оҕолор суруйааччы олоҕун, айар үлэтин туһунан интэриэһинэй кэпсээни иһиттилэр, кини кинигэлэрин быыстапкатын сэргээн көрдүлэр. Тэрээһини тэрийдэ оскуолабыт бибилэтиэкэтин үлэһитэ Анисимова Надежда Анисимовна.
Бу курдук биир өттүнэн төрүт үгэскэ уһуйуллуу, атын өттүнэн духуобунай баайга тардыһыы оҕолорбут сайдыыларыгар улахан суолталаах күн буолан ааста.
Кэскил14.ру
Н.И. Прокопьев аатынан Хатыы орто оскуолата