Дьокуускай куорат 2-с нүөмэрдээх оскуолатыгар Исаков Андрей Георгиевич «Кречет» кэриэһигэр анаммыт саанан ытыыга аһаҕас өрөспүүбүлүкэтээҕи турнир үрдүк таһымнаахтык арылынна. Тэрээһиҥҥэ өрөспүүбүлүкэ араас муннугуттан 16 араас оскуола үөрэнээччилэрэ кыттыыны ыллылар.
Тэрээһин үөрүүлээх чааһыгар 2-с нүөмэрдээх оскуола дириэктэрэ Василий Владимиров эҕэрдэ тыл эттэ. Кини бэлиэтээбитинэн, быйыл бу күрэхтэһии оскуола выпускнига, Аҕа дойдуну көмүскээччи Исаков Андрей Георгиевич сырдык кэриэһигэр ананар. Уопсайа бу сылга үсүһүн ыытыллар.
«Андрей Исаков 2000 сыллаахха биһиги оскуолабытын бүтэрбитэ. Кини холобура биһиэхэ барыбытыгар – үүнэн эрэр көлүөнэҕэ – улахан суолталаах. Бу күрэхтэһиилэрбит сыаллара-соруктара диэн оҕолорбутун Ийэ дойдуга бэриниилээх буоларга, төрөөбүт дойдуларын таптыырга, кининэн киэн туттарга иитии буолар», – диэтэ дириэктэр.
Василий Владимиров турнир тэриллиитигэр саамай улахан күүс-көмө буолбут дьоҥҥо – Андрей ийэтигэр, быраатыгар уонна чугас доҕоругар – истиҥ махталын биллэрдэ. Кини эппитинэн, Андрейы кытта бииргэ сулууспалаабыт уолаттар кэлэн, тэрээһиҥҥэ кыттыыны ылбыттара бу күнү эбии долгутуулаах оҥордо.
Дириэктэр оҕолорго туһаайан: «Эһиэхэ кыайыыны, ситиһиини уонна эйэлээх халлааны баҕарабын!» – диэн алҕаан туран, кыттыбыттарын иһин барыларыгар махтанна.
Күрэхтэһии кэмигэр кыттааччылар санаалара эмиэ көтөҕүллүбүтэ.
Биир оскуола үөрэнээччитэ бэйэтин этиитигэр: «Маннык улахан, үчүгэйдик тэриллибит күрэхтэһиигэ кыттар наһаа үчүгэй. Биһиги, оҕолор, олус үөрдүбүт, тэрийээччилэргэ, учууталларбытыгар уонна ыҥырыылаах ыалдьыттарга, чуолаан Андрейы кытта бииргэ сулууспалаабыт уолаттарга, улахан махталбытын тиэрдэбит. Бу күн биһиэхэ умнуллубат өйдөбүлү хаалларда», — диэн санаатын үллэһиннэ.
Тэрийээччилэр бу күрэхтэһии сыллата ыытыллан, үүнэр көлүөнэҕэ патриотическай иитии биир сүрүн тирэҕэ буоларыгар эрэллээхтэр.
Кэскил14.ру