Алтынньы 17 күнүгэр Степан Васильев аатынан Ньурба элбэх хайысхалаах гимназиятыгар «Калейдоскоп» медиа-фестиваль 100-тэн тахса кыттааччы — оскуола медиакииннэрин, чилиэннэрин уонна салайааччыларын муста.
Ньурба оройуонун үөрэҕин салалтата Ньурбатааҕы араас хайысхалаах гимназия оскуола медиакииннэригэр анаммыт «Калейдоскоп» медиа-фестивальы үһүс төгүлүн ыытар. Медиафестиваль контены оҥорууга, идэтийбит ситимнэри бөҕөргөтүүгэ уонна уопуту атастаһыыга туһуланар.
Быйылгы медиа-фестивальга элбэх болҕомто кэлэн иһэр XI спортивнай Саха норуоттарын оонньууларыгар ананна:
• идэтийбит фотограф Р. Кириллин хаартыскаҕа уонна видеоҕа спортивнай күрэхтэри түһэрии туһунан көрдөрдө;
• суруналыыс этикатын, хайдах кадрга үлэлиир туһунан НВК «Саха» Ньурбатааҕы филиалын сүрүн эрэдээктэрэ Р. Саввинов, телевидение режиссера К. Антонова, оператор Г. Матвеев кэпсээтилэр;
• «Оҕо киинэтэ» секцияҕа Егоров А.В. сценарийы хайдах суруйар туһунан кэпсээтэ, видеороликтары оҥорууга аныгы инструменнэринэн — ИИ (Айыллыбыт Интеллек) туһунан үллэһиннэ;
• “Улуус спортивнай олоҕун хайдах кэпсиибит?” секцияҕа Спортивнай оонньуулар дириэксийэтиттэн Тимофеев С.В. билиһиннэрдэ.
Быйылгы фестиваль үрдүк таһымнаахтык уонна олус интэриэһинэйдик ааста. Маастар-кылаастартан ураты станциянан оонньуулар, психологическай трениннэр, «Биир күн төлөппүөнэ суох» видеороликтар күрэхтэрэ буоллулар.
Фестиваль кыттааччылара саҥа билиилэри ыллылар, оскуола медиакииннэрин ыккардынааҕы ситимнэри бөҕөргөттүлэр.
Видеороликтар күрэҕин түмүгүнэн Михаил Мегежекскай аатынан Маалыкай орто оскуолатын медиакиинэ кыайыылааҕынан биллэрилиннэ, оттон “Көрөөччү биһирэбилэ” номинацияҕа куоластааһын түмүгүнэн Алексей Алексеев аатынан Чуукар орто оскуолатын медиакиинэ кыайыыны ситистэ. Медиа-фестиваль эдэр кэрэспэндьиэннэргэ медиа эйгэтигэр дьоҕурдарын сайыннарарга кыах биэрдэ.
Камелия Яковлева, Маар орто оскуолатын «Юла» медиакиин
Кэскил14.ру