Быйыл «Кэскил» хаһыат төрүттэммитэ 95 сааһын бэлиэтиир. Ол курдук биһиги «Бэлэм буол» хаһыат 1971 сыл ыам ыйын 27 күнүгэр тахсыбыт ыстатыйатын көрдүбүт. Манна «Зарница» оонньуу туһунан суруйбуттар.
Бу 1971 сыллаахха тахсыбыт «Бэлэм буол» хаһыат сирэйин көрөн баран, урукку уонна билиҥҥи кэмнэ тэҥнээн көрдөххө олус атыттар эбит. Саха сиригэр уонна бүтүн дойду үрдүнэн байыаннай-спортивнай оонньуу хайдах уларыйыыны барбытын көрүөхпүт.
Урут оҕолор боростуой кумааҕы картанан, мас автоматтарынан уонна бэйэ оҥоһуута былаахтарынан оонньуур эбит буоллахтарына, билигин «Зарница 2.0» иһигэр лазертаг, дроннары (БПЛА) салайыы уонна киберкомандалар баар буолбуттар. Кэминэн сайдан, оонньуу уларыйбыта биллэр.
Былыргы «Зарница» ордук кутталлаах уонна тыҥааһыннаах— оҕолор өстөөхтөрүн погоннарын хайыта тардан ылаллар. Билигин ити суох, барыта электроннай датчиктар уонна лазер көмөтүнэн барар.
Арай биһиги оскуолабытыгар ыам ыйыгар 5-11 кылаас уолаттара погон былдьаһан уруккулуу «Зарницаҕа» кытталлар. Онон биһиэхэ урукку уонна билиҥҥи зарницалар иккиэн буолаллар.
Хаһыакка пионердар олус кытаанах бэрээдэктээхтэрин уонна чахчы Сэбиэскэй Армияҕа сулууспалыырга бэлэмнэнэллэрин суруйбуттар. Билиҥҥи оонньуу сыала арыый киэҥ — манна байыаннай дьыала эрэ буолбакка, оҕо лидерскай хаачыстыбатын уонна хамаанданан үлэлиир дьоҕурун сайыннарыыга улахан болҕомто ууруллар.
Бу тэҥнээһин көрдөрөрүнэн, оонньуу ис хоһооно уонна сыала биир — оҕолору түмүү, дойдуга бэриниилээх буолууга үөрэтии. Ол эрээри үйэ уларыйан, оонньуу ньымалара уонна туттар тэриллэрэ олох атын таһымҥа тахсыбыттар.
Сэбиэскэй кэмнээҕи кытаанах бэрээдэк билиҥҥи үйэҕэ үрдүк технологияларынан уонна квест буолан солбуллубуттар. Олус туһалаах уонна ис хоһоонноох тэҥнээһин эбит!
Бурцева Нарияна, М.Е.Васильева аатынан 2 Малдьаҕар орто оскуолатын 9 кылааһын үөрэнээччитэ, «УОТ» медиакиин