Эбээн Бытантай улууһун Саккырыыр орто оскуолатын үөрэнээччилэрэ уонна уһуйуллааччылара, 7 оҕо буолан, «Венера у Море» диэн Дойдулар икки ардыларынааҕы конкурс-бэстибээлгэ кыттар чиэскэ тиксэн, кыайыы көтөллөөх тиийэн кэллибит. Ол курдук, улахан кыргыттар Лейсан Аммосова, Эрика Горохова («Осикатал-Северные Олени» ансаабыл), кыра кыргыттар Намыына Слепцова, Дайана Тотонова, Айсель Слепцова, Аина Андросова («Миргилан-Чубукулар» ансаамбыл) уонна ырыаҕа Раиса Другина («Стадо Асаткании») ыҥырыллан, балаҕан ыйын 14 күнүгэр дойдубутуттан айаннаан, куоракка кэлэн, салгыы теплоходунан уонна поеһынан айаннаан тиийбиппит.
Ол курдук, икки күн устата Благовещенск куоракка тиийэн эмиэ салгыы айаҥҥа туруннубут. Сорох оҕолорум урут айаннаабыт, кыттыбыт буоланнар, уопуттаахтар, билэллэр-көрөллөр. Хата, атыттарым олох сылайбатылар, хоту хоһуун дииллэринии, уһун айаны кыайдыбыт.
Кыттар куораппытыгар Бэйдэйхэ сарсыарда тиийэн, оннубутун булуммуппут. Бэстибээл иннинэ репетициялыы таарыйа сыбаайбаҕа кытыннара ыҥырбыттарын быһа гыммакка, кытынныбыт, ытыс тыаһын хомуйдубут. Куонкуруспут буолуон иннинэ оскуолаҕа оҕолорго мастер кылаас көрдөрдүлэр, онон үөрүүбүт үгүс.
Бэстибээл буолар күнэ үүнэн, күнүс 3ч куонкурс саҕаламмыта, оҕолор долгуйан, харса суох номердарын көрдөрдүлэр, олус үчүгэйдик кытыннылар. Кыра кыргыттарым лауреат аатын сүктүлэр, оттон улахан акробаттарым Гран-при буоллулар — дьолломмуппутуон!
Онон оҕолор, биһиги бары, үөрүү көтөллөөх, астынан, дуоһуйан кэллибит. Ону таһынан куорат устун күүлэйдэппиттэрэ, сарсыҥҥытыгар эмиэ элбэх араас сирдэринэн экскурсия ыыттылар, муораҕа сөтүөлээн, харааран, умнуллубат күннэри атаардыбыт. Дойдубутугар төттөрү айанныыр суолбут Пекин куоратынан буолла. Дьэ, онно Кытай циркатыгар сылдьан, кытай оҕолорун-акробаттары көрөн сөхтүбүт, дуоһуйдубут.
Ити курдук, Улуу Кытай сиригэр сылдьан элбэҕи билэн-көрөн, бэйэбитигэр саҥаны арыйан, көрсүө-сэмэй кытай дьонун кытта алтыһан, уһуйааммыт, оскуолабыт чиэһин көмүскээн, дойдубутугар ситиһиилээх, илии тутуурдаах уонна өттүк харалаах төнүннүбүт.
Христина Иннокентьевна Стручкова, Эбээн Бытантай улууһун Саккырыыр нэһилиэгин физ.инструктора