Атырдьах ыйын 15 күнүгэр президент граннарын пуондатын өйөбүлүнэн, «Хамсаныы — бу олох төрдө» бырайыак чэрчитинэн дьиэ кэргэн «Үйэ эстэпиэтэтэ» диэн спортивнай бырааһынньык ыытылынна.
Күрэхтэһиибит сүрүн кыттааччылара — оҕолор уонна кинилэр дьиэ кэргэттэрэ. Кыайыы иһин күөн көрсө 10 дьиэ кэргэн хамаандата таҕыста. Эстэпиэтэбит 8 уустук түһүмэхтэн турда, бу күрэх кыттааччылартан түргэн эрэ буолбакка, биир ситимнээхтик үлэлиир сатабылы эрэйдэ. Күрэхтэһии көхтөөх, үөрүүлээх уонна доҕордуу тыыннаах буолан ааста — кыайыыга бары ис сүрэхтэриттэн кыһаллан туран дьулустулар.
Күрэхтэһии сиэрдээхтик барарын ТОС «Теплица» олохтоохторо — саамай кытаанах, ол эрээри чиэһинэй судьуйалар дьүүллээтилэр. Очукуолары ааҕыы түмүгүнэн миэстэлэр маннык буоллулар: 1 миэстэ — Соровтар дьиэ кэргэн, 2 миэстэ — Васильевтар дьиэ кэргэн, 3 миэстэ — Федоровтар дьиэ кэргэн.
Кыайыылаахтары ис сүрэхтэн эҕэрдэлиибит! Эһиги чаҕылхай, түргэн уонна сомоҕолуу буолууну көрдөрдүгүт. Атын кыттааччыларга барыларыгар улахан махталбытын тиэрдэбит — эһиги көхтөөхтүк кыттан, көрү-нары, үөрүүнү-көтүүнү бэлэхтээтигит! Бары бириистээх миэстэлэри ылбыттар грамотанан уонна сыаналаах бириистэринэн наҕараадаланнылар.
Бу күн биһиэхэ тирэх буолбут эрэллээх партнердарбытыгар истиҥ махталбытын биллэрэбит: ХОК тэрилтэҕэ — хаачыстыбалаах спортивнай инвентарын биэрбитигэр; Нэһилиэк администрациятыгар — тэрээһини тэрийистилэр, кыайыылаахтарга грамоталары уонна сыаналаах бириистэри туттардылар.
Спорт былаһааккатыгар көрсүөххэ диэри! Салгыы бары бииргэ хамсанабыт! Чөл олоҕу тутуһабыт!
Дианна Соломонова, Харбалаах, Таатта