Биһиги нэһилиэкпитигэр биир дойдулаахпыт, биллиилээх тустуук Егор Вензель доҕорун Лукас Сантамарияны кытта кэлэ сылдьар. Лукас 23 саастаах, Францияттан сылдьар. Кинилэр Владикавказ куоракка тустууга эрчиллэ сылдьан билсибиттэр.
Ыалдьыаппыт олоҕор тыа сиригэр сылдьыбатах, тыа сирэ диэни хаһан да көрбөтөх эбит. Арассыыйаҕа кини бу төрдүс сырыыта. Ол иһигэр Саха сиригэр аан бастакытын сылдьар.
Танда бибилэтиэкэтигэр биир дойдулаахпыт доҕорун кытта олус интэриэһинэй көрсүһүү буолла. Көрсүһүүгэ тылбаасчытынан омук тылын учуутала Анна Александровна Вензель үлэлээтэ. Лукас оҕолорго анаан французтуу саҥаран иһитиннэрдэ, бэйэтин уонна дойдутун туһунан кэпсээтэ. Кини Франция биир улахан Лион диэн куоратыттан сылдьар. Идэтинэн программист уонна тустуунан дьарыктанар. Ийэтэ Испанияттан төрүттээх, кардиолог быраас. Аҕата Италия уола, айар куттаах худуоһунньук эбит. Эдьиийэ киниттэн үс сыл аҕа, парикмахер идэлээх.
Кини урут, английскай тылы билбэт эрдэҕинэ, атын омуктары кытта кэпсэтэрэ олус уустук эбит. Билигин бу тыл көмөтүнэн аан дойдуну көҥүл кэрийэр, араас омук дьонун кытта билсэр, кэпсэтэр. Лукас нуучча тылын үөрэтэн саҕалаан эрэрин туһунан кэпсээтэ. Саха сиригэр көһөн олорон көрүөн баҕарарын, биһиги ыраас салгыммытын, кэрэ айылҕабытын, эргиччи тулалыыр чуумпуну сөбүлээбитин туһунан этэр.
Лукас күннээҕи олоҕун тэтимэ түргэн. Холобур, сарсыарда 6-7 чааска турар. Онтон үлэлии барар, уопсай дьарыкка сылдьар, ол кэннэ эмиэ үлэлиир, онтон тустуу дьарыгар барар. Үлэни кытта сөбүлүүр дьарыгын тэҥҥэ тутан илдьэ сылдьар. Ол икки ардыгар бэйэтин сайыннарарыгар бириэмэни хайаан да булар.
Көрсүһүү түмүгэр оҕолор ыраахтан кэлбит ыалдьыты кытта хаартыскаҕа түстүбүт.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан