От ыйын 11 күнүгэр, Бөтүрүөп куйааһын көрсө, Харбалаах бөһүөлэгэр, «Теплица» ТОС олохтоохторугар олус үөрүүлээх күн буолан ааста. Бу күн «Хамсаныы-бу олох, олох-бу хамсаныы» диэн ааттаах Арассыыйа президенин фондатын гранын кыайыылааҕа бырайыак сүнньүнэн оҥоһуллубут олус үчүгэй эти-сиини чэбдигирдэр былаһаакка арыллыыта нэһилиэк олохтоохторун түмтэ.
Үөрүүлээх тэрээһин Орто Амма нэһилиэгин баһылыга А.И.Кулачиков эҕэрдэтинэн саҕаланна. Бу тэрээһин дьоһун ыалдьытынан Саха Өрөспүүбүлүкэтин ыччатын уонна олох-дьаһах коммуникациятын министрэ, АБДь кыттыылааҕа П.В. Шамаев буолла. Үгэс быһыытынан аалай лиэнтэни кырыйыы кэнниттэн тэрээһин бары кыттыылаахтарын кыынньар кымыһынан, арыынан аллар алаадьынан айах тутуу буолла.
Салгыы тэрээһиҥҥэ кыттыбыт оҕолор күргүөмүнэн сүүрдүлэр. Араас эти-хааны чэбдигирдэр оонньуулар, былаһааккаҕа турар тренажердарынан хайдах эрчиллэргэ үөрэтэр маастар-кылаастар ыытылыннылар. Сонун оонньуу-күрэхтэргэ кыттан кыайбыттар анал бириистэринэн бэлиэтэннилэр.
Чэбдик олоҕу көҕүлүүр бэтэрээннэри анаан эҕэрдэлээһин буолла. Бу үөрүүлээх түгэни иэйиилээх дьүрүлүнэн дьүһүйүү сиэрин ситэрэн биэрдэ. Тэрээһин түмүгэр сылаас чэйдээх остуол тула олорон, санаа атастаһыыта, бырааһынньык туордун амсайыы олус истиҥ эйгэни олохтоото.
Бу бырайыак олоххо киириитигэр күүс-көмө, өйөбүл буолбут ТОС, нэһилиэк олохтоохторугар, тэрилтэлэргэ бырайыак ааптара Дианна Егоровна барҕа махталын тиэртэ, «Махтал суруктары» кытта бэйэтин анал бэлэхтэрин туттартаата.
Чэгиэн-чэбдик олоххо сирдиир саҥа тэриллибит былаһаакка Харбалаах олохтоохторун, ыччаттарын, оҕолорун түмэн, дьарыктанар, бэйэ доруобуйатын көрүнэр буоларга сирдии, ыҥыра, угуйа турар сир буолуо диэн бигэтик эрэнэбит. Нэһилиэкпит дьокутаата, ТОС «Теплица» салайааччыта Д.Е. Соломонова үйэлээх, кэскиллээх бырайыактара Харбалаах сайдыытын түстүү туралларын иһин барҕа махталбытын тиэрдэбит! Айымньылаах, кэскиллээх көҕүлээһиннэрэ бар дьонугар үтүөни эрэ олохтуу турдуннар диэн алгыспытын аныыбыт!
Валентина Кривошапкина, Харбалаах, Таатта