Биһиги өрөспүүбүлүкэбитигэр, ордук кэнники кэмҥэ, бэйэ оҥоһугунан дьарыктаныы киэҥник тарҕанна. Ол биир туоһутунан оскуолабыт иһинэн үлэлии тутар «Сыккыс» оҕо лааҕырыгар туой оҥоһукка кэрэхсэбиллээх маастар-кылаас ыытылынна.
Бу тэрээһиҥҥэ лааҕыр оҕолоро эрэ буолбакка, төрөппүттэр эмиэ көхтөөхтүк кыттыыны ыллылар. Бэйэлэрэ тутан-хабан көмүлүөк оһох оҥордулар.
Маастар-кылааһы С.К. Макаров аатынан Чурапчы гимназиятын 8-с кылааһын үөрэнээччитэ Айыына Гуляева ыытта. Айыына үһүс сылын туой оҥоһуктарынан ситиһиилээхтик дьарыктанар. Кинини эбэтэ, норуот маастара Наталья Егоровна Гуляева, туой ууһун кистэлэҥнэригэр үөрэппитэ. Эбэтин кытта нэһилиэктэринэн маастар-кылаастары көрдөрөн, уопутун үллэстэр. Кэнники сылларга Айыына туойунан күүскэ дьарыктанан, араас оҥоһуктары хомуйан, бэйэтэ кыра бизнеһи оҥостубута.
Туойунан үлэҕэ араас инструменнары туттар эбит. Холобур, туой хайдыбыт өттүн көннөрөргө аналлаах губканы, туойу тэнитигэр скалканы, лаппаахыны, оһуор түһэрэргэ стектэри, петлялары, циклялары. Айыына бэйэтин оҥоһуктарыгар уруһуйдары, харысхаллары бэйэтэ айан оҥорор, түһэрэр.
Туой оҥоһугунан дьарыктанарыгар бастаан элбэх ыарахаттары көрсүбүт. Холобур, биир оҥоһугу өр оҥорор эбит буоллаҕына, сотору кэминэн үөрэнэн түргээтээбит.
Туойу Хатылыттан атыылаһан туһанар. «Бастаан туойу үчүгэйдик имитэн, салгынын таһаарыахха наада. Имиппэтэххэ, буһа туран хайа барыан сөп. Туойунан оҥоһук хайаан да анал оһоххо буһарыллыахтаах. Хатылы туойа туһанарга ордук үчүгэй», – диэн кэпсиир Айыына.
Кини бу бэйэтэ ыыппыт бастакы маастар-кылааһа. Онон дьону кытта алтыһан, хас биирдиилэригэр көмөлөһөн, сүбэ-ама биэрэн, билиитин-көрүүтүн дириҥэттэ, улахан уопуту ылла. Салгыы сайдан, өссө элбэх маастар-кылааһы ыытыан баҕарар.
Бу маастар-кылаас түмүгүнэн, бары кыттааччылар оҥоһуктарыттан олус астынан, дуоһуйан, Айыынаҕа махтанан тарҕастылар.
Лилия МАРКОВА, IX кылаас, «Мичээр» медиа-киин,
А.П. Илларионов аатынан Хайахсыт орто оскуолата, Чурапчы