Мин тоҕус саастаахпын. Дьокуускай куорат 17 №-дээх орто оскуолатын III «В» кылааһын бүтэрдим. Үөрэхпэр туйгуммун. Кылааспытыгар 40 оҕо буолан үөрэнэбит. Тапталлаах учууталбыт Любовь Святославовна Заровняева, СӨ үөрэҕириитин туйгуна, СӨ үтүөлээх учуутала, РФ бочуоттаах учуутала, РФ Президенин Гранын кыайыылааҕа. Кини биһигини олус үчүгэйдик үөрэтэр.
Биһиги иккис кылаастан учууталбыт Любовь Святославовна уонна оскуола бибилэтиэкэрэ Пелагея Алексеевна Сивцева көҕүлээһиннэринэн, кылаас таһынан ааҕыыны саҕалаабыппыт. Бүгүҥҥү күҥҥэ номнуо 60 айымньыны аахтыбыт: 33 нууччалыы, 27 сахалыы кэпсээни.
Ый аайы кэпсээннэри ааҕан баран, кылааспытыгар биктэриинэ толоробут. Ол түмүгүнэн кыайыылаахтары талабыт, аахпыт кэпсээннэрбитин ааҕааччы күннүгэр суруйан тиһэн иһэбит.
Иккис кылааска сыллааҕы түмүккэ биктэриинэ кыайыылаахтарынан Арсен Жирков, Эрчим Бястинов, Марика Захарова буолбуттара. Үһүс кылааска биктэриинэ кыайыылаахтарынан Арсен Жирков, Сандаар Семенов, Байдам Волков буоллубут.«Ааҕааччы бастыҥ күннүгэ» анал аат хаһаайыннарынан Артемий Чылбынов, Виолетта Трофимова, Антон Захаров, Милена Васильева, Сандаар Семенов буоллубут.
Мин саамай сөбүлүүр суруйааччыларым Виктор Драгунскай, Николай Носов, Иннокентий Сосин. Саамай сөбүлээбит кэпсээним Виктор Драгунскай «Тайное становится явным» диэн. Бу кэпсээни ааҕан баран күлбүтүм ахан, наһаа көрүдьүөс кэпсээн этэ.
Сахалыы айымньылартан Д.К.Сивцев-Суорун Омоллоон «Маныыһыт уонна тарбыйах» кэпсээнин сөбүлээтим. Манна киһи саҥалаах, тыллаах буолан, оҕотун бөрөттөн быыһыыр, онтон ынах тыла суох буолан, ньирэйин кыайан быыһаабат.
Биһиги Иннокентий Сосин Саха сирин айылҕатын, кыылларын туһунан суруйбут кэпсээннэрин сөбүлээн аахтыбыт: «Баҕа хайдах бултууруй?», «Ыт утуйар мээрик буолбут», «Тураах күөмэйэ бүппүт», «Сордоҥ булдугар тахсыбыт». Айылҕаны, кыыллары кэтээн көрөн, хайдах күн-дьыл буоларын сылыктыырга үөрэннибит.
Мин ааҕарбын олус сөбүлүүбүн. Олус кыһаллан ааҕыы күннүгүн толоробун. Ааҕар буоламмыт элбэҕи биллибит, сахабыт тылын сайыннарабыт. Ааҕыыны тэрийэр күндү учууталларбытыгар махтанабыт!
Сандаар СЕМЕНОВ,
IV «В» кылааc,
Дьокуускай куорат 17-с №-дээх оскуолата