Дьоллоох оҕо саас биһиги олохпутугар биирдэ бэриллэр кылгас да буоллар алыптаах, дьиктилээх, көрдөөх-нардаах, умнуллубат, саамай чаҕылхай кэрэ кэм буолар. А.И Софронов — Алампа хоһуйбутун курдук «Оҕо-оҕо эрдэххэ оонньоомохтоон хаалыаҕыҥ!» диэн мээнээҕэ эппэтэҕэ чахчы. Ол курдук, ыам ыйын 13 күнүгэр Лөгөй лиссиэй-интэринээтин алыҥ сүһүөҕүҥ оҕолоро уонна учууталлара ол эбэтэр «ИСТОК» методическэй бөлөх аан маҥнайгытын «Оһуордаах оҕо саас» диэн кэнсиэри тэрийэн бөһүөлэк олохтоохторугар бэлэх ууннулар. Кылаас салайааччылара: 1 кылаас сал. Н.С Олесова, 2 кылаас сал. А.Г Кычкина, 3 кылаас сал. Л.И Карманова, 4 кылаас уонна «ИСТОК» бөлөх сал. В.Г Нафанаилова буолаллар.
Ол курдук, кэнсиэри иилээн-саҕалаан ыытта М.Ф Попова. Үҥкүүлэри О.Н Перевалова, уус уран ааҕыылары З.П Лугинова, ырыалары А.Р Харитонова, муодалары А.Г Кычкина уонна спортивнай, тэтимнээх үҥкүүнү М.Г Аммосова туруордулар. Бука бары хас биирдии кылаас күүс-көмө биир сомоҕо буолан бу кэнсиэр, саҥа бырайыак нэһэлиэнньэҕэ сүрэхтэннэ. Кэнсиэргэ киирбит харчыттан Лөгөй нэһилиэгэр, Кэптэнигэ, тэриллэр биир дойдулаахпыт Н.П Бурнашев-Боодоҕос төрөөбүтэ 125 сыллаах үбүлүөйдээх улуустааҕы Олоҥхо Ыһыаҕар, көмө харчы, бэлэх ууммуттара — үтүө дьыала. Онон бастакы спонсорствону ЛЛИ-ин алыҥ сүһүөҕүҥ коллектива туттарда.
Түмүккэ үөрэх чааһыгар дириэктэри солбуйааччы М.В Петрова «ИСТОК» методическэй бөлөххө махтал сурук, Зинаида Лугиноваҕа Өрөспүүбүлүкэтээҕи олоҥхо кииниттэн махтал сурук кэлбитин үөрүүлээх быһыыга-майгыга туттарда уонна бүтүн оскуола аатыттан махтанан кэнсиэр көрдөрбүт оҕолорбутугар минньигэс ас, утах бэлэх уунна. Маны тэҥэ «ИСТОК» бөлөх күүс-көмө буолбут төрөппүттэргэ улахан, улахан махталын үрдүк сыанаттан биллэрдэ. «Оһуордаах оҕо саас» диэн бырайыак сылтан сыл тэриллэ, үүнэ-сайда тур!
Янис СЫСОЛЯТИН, VIII кылаас
«SiTiM LegMedia» киин юнкора
Лөгөй лиссиэй-интэринээт, Уус Алдан