Бу күннэргэ биһиги Антоновка сэлиэнньэтигэр баар «Gektor» диэн ааттаах кыыллары иитэр-харайар зоопарка-дьиэ туһунан кэпсиэхпит. Бу сир уһуйаан буолбатах, атын дойду кыылларын көрөн, харайан, билсэн, үөрэтэр ураты эйгэлээх сир. Манна айылҕаҕа сыһыаннаах үлэ, аймах таптала уонна экзотическай кыыллар бииргэ холбоһон олороллор.
Саҥа санаа хайдах төрөөбүтүй?
«Gektor» хаһаайыттара Дмитрий Егорович уонна Анжела Олеговна Григорьевтар. Кинилэр кэпсииллэринэн, зоопарка-дьиэ тэриллиитэ олус көхтөөх санааттан үөскээбит эбит.
— Бастакытынан, бэйэбитин уонна оҕолорбутун үөрдэр, санаабытын сааһылыыр сир оҥорорго санаммыппыт. Ол эрээри, сайын аайы элбэх дьон кэлэн кыылларбытын көрөн үөрэллэрин көрөммүт, бу дьоҥҥо туһалаах буолуон сөп диэн өйдөөбүппүт, — диэн этэр ыал ийэтэ Анжела Олеговна.
Билигин «Gektor» сэлиэнньэ эрэ иһигэр буолбакка, оройуон иһигэр биллэр сир буолла.
«Gektor» аата хайдах тахсыбыт?
Урбаанньыттар этэллэринэн, зоопарка аата «күүс», «эрчим» диэн суолталаах. Ааты дьиэ баһылыга сөбүлүү истибит. Экзотическай кыыллар дойдуларыгар «Gektor»-га киирдэххэ, атын эйгэҕэ түспүт курдук буолаҕын. Манна павлиннар кэрэ бэйэлэринэн бааллар, хорёктар, үөн көрүҥнээх ооҕуй оҕустар уонна ураты көтөрдөр олороллор. Хаһаайыттар кэпсииллэринэн, зоопаркаҕа баар харамайдар бары кыра эрдэхтэриттэн иитиллибиттэр, ол иһин кинилэр дьонтон куттамматтар, олус сымнаҕастар.
Ыалдьыттар саамай сөбүлүүр кыылларыттан биирдэстэрэ павлиннар буолаллар. Кинилэр куйахтарын арҕаһын курдук сараҥныыр кутуруктарын арыйан, көрүүгэ күннэтэ туруорбаттар. Онтон оҕолор ордук хорёктары уонна куоска курдук сымнаҕас кыыллары сөбүлээн көрөллөр, хаартыскаҕа түһэллэр.
Саха сиригэр экзотика хайдах олороруй?
Кыһын тымныы буоларын бары билэбит. Ол эрээри «Gektor» хаһаайыттара бу маны өйдөөн, кыылларга анал сылаас, вентиляциялаах дьиэлэри оҥорон, сылаас эйгэни тэрийбиттэр.
— Биһиги сүрүн сыалбыт — кыылларга дьиэ курдук буолар эйгэни оҥоруу, — диэн Григорьевтар этэллэр.
Кыыллар аһылыктара эмиэ болҕомтоҕо ылыллар. Павлиннар, хорёктар, козалар уонна атын кыыллар бары бэйэлэригэр сөптөөх аһы аһыыллар.
Оҕолорго — үөрэх, улахаттарга — сэһэргэһии
«Gektor» аҥардас кыылы эрэ көрөр сир буолбатах. Манна оҕолорго аналлаах экскурсиялар ыытыллаллар, кыыллар туһунан кэпсэтии, айылҕаны харыстыыр туһунан үөрэх барар
Аан бастаан мини-зоопаркаҕа үктэммит оҕолор ооҕуй-оҕуһу, эриэн үөннэри эбэтэр павлины тиийэн көрбүттэрин умнубаттар. Психологтар этэллэринэн, оҕолорго харамайдар, кыыллар истиҥ сыһыаны — эмпатияны эмиэ үөскэтэллэр, сайыннараллар, айылҕаны таптыырга үөрэтэллэр.
Дьиэ бизнеһэ — аймах үлэтэ
Бу барыта биир дьон үлэтэ буолбатах. «Gektor» — улахан дьиэ кэргэн бырайыага. Улахан хаһаайыстыбаны көрүүгэ бары кытталлар: ким эрэ ас бэлэмниир, ким эрэ вольер ыраастыыр, ким ыалдьыттары көрсөр. Инникитин Анжела Олеговна уонна Дмитрий Егорович Григорьевтар бу эйгэлэрэ салгыы тохтоон хаалбакка, өссө эбии сайдарыгар баҕараллар. Кинилэр саҥа кыыллары аҕалан коллекцияны кэҥэтэргэ, экскурсиялары элбэтэргэ, оҕолорго анал бырагыраамалары тэрийэргэ баҕараллар.
— Сүрүнэ — дьон айылҕаны таптыырга үөрэннин, кыылларга харыстабыллаах сыһыаны көрдөрдүн, — диэн кинилэр баҕа санаалаахтар.
Түмүк
«Gektor» — зоопарка эрэ буолбатах. Бу — таптал, үлэ уонна хорсунсанаа холбоһон төрөппүт ураты сирэ. Манна кэлбит киһи кэлии кыылы эрэ көрбөт. Кини айылҕа олоҕун атын өттүн, дьон сүрэҕин сылааһын уонна кыылларга тапталы билэр.
Хайаан даҕаны Антоновкаҕа сылдьар буоллаххытына, «Gektor» зоопарка-дьиэҕэ киирэн ыалдьыттааҥ!
Надя ЗАХАРОВА,
Таня ИГНАТЬЕВА, Алина ИВАНОВА, «Объектив» медиа-киин эдкордара.
Текст Виолетта ВАСИЛЬЕВА, «Объектив» медиа-киин эдкора.
Кэскил14.ру