Г.И. Чиряев аатынан Бүлүү куоратын 1-кы нүөмэрдээх орто оскуолатыгар «Сквозь годы: Победа в открытках» диэн ураты быыстапка арылынна. Экспозиция төрүөтүнэн тыыл уонна үлэ бэтэрээнэ, Саха Өрөспүүбүлүкэтин култууратын бочуоттаах бэтэрээнэ Семен Телье-Иванов сэдэх коллекцията буолла.
Семен Викторович открыткалары 1969 сылтан утумнаахтык мунньар. Сэрии знамялара ойууламмыт маҥнайгы экземплярдартан саҕалаан, эйэни кэрэһэлиир аныгы открыткаларга тиийэ — хас биирдии экспонат дойдубут улуу устуоруйатын кэпсиир. Кини коллекциятыгар 140 араас открыткалар бааллар эбит. Көрдөххө урукку кэмнээҕи открыткаларга кыһыл сулус, мэтээллэр, гвоздика сибэкки, эйэлээх олох ойууланар буоллаҕына билигин саҥа сүүрээн цифровой открыткалар баар буоллулар. Уруһуйа — салют, холууп, оҕолор бэтэрээннэргэ сибэкки бэлэхтии тураллара ойуулааах. Ол гынан открытка сүрүн тутула — хорсун быһыы туһунан өйдөбүл уонна төрөөбүт дойдуну көмүскээччилэргэ ытыктабыл. Бу хаһан да уларыйбат.
Быыстапка саамай долгутуулаах түгэнинэн быйылгы выпускниктар соһуччу арыйыылара буолла. Өрөспүүбүлүкэтээҕи НПК хас да төгүллээх кыайыылааҕа Динара Веревкина кылааһын оҕолорун кытта 2008 сыллаахха, ол эбэтэр бэйэлэрэ төрөөбүт сылларыгар тахсыбыт открытканы буллулар. Бу оҕолорго кинилэр дьылҕалара төрөөбүт дойдуларын устуоруйатын кытта быстыбат ситимнээҕин, Кыайыы тыыннаах өйдөбүлүн өссө төгүл дакаастаата.
Бу быыстапка биһиги бүгүн Кыайыы улуу летопиһын салҕааччылара буоларбытын уонна үтүө үгэһи харыстыыр, кэрэһэлиир ытык иэстээхпитин өйдөтөр.
Леонард Петров, юнкор, VIII кылаас,
Г. И. Чиряев аатынан
Бүлүү 1-кы №-дээх орто оскуолата,
«Ориентир» медиа-киин кэрэспэдьиэнэ