Муус устар 29 күнүгэр Горнай Бэрдьигэстээҕэр М.С. Егоров аатынан сынньалаҥ Киинигэр В.С. Яковлев-Далан «Дьикти саас» айымньытынан «Кэрэ кэм» диэн испэктээк буолан ааста. Быйыл нэһилиэкпитигэр биллэриллибит Ыччат сылыгар ананан туруорулунна. Бу туруорууга А.Н. Осипов аатынан, С.П.Данилов аатынан оскуолалар үөрэнээччилэрэ уонна учууталлара, ону тэҥэ норуот тыйаатырын артыыстара оонньоотулар. Ипэктээги тыйаатыр салайааччыта Елизавета Иевна Мартынова туруорда.
Мин биир бэйэм Людмила Сергеевна диэн омук тылын учууталын оонньоотум. Испэктээккэ бастакы холонуум буолан, кыра долгуйааһын баара, ол эрэн омук тылын учуутала буоларым быһыытынан, улахан ыарахаттары көрсүбэтэҕим. Людмила Сергеевна эмиэ даҕаны дьоһуннаах, ирдэбиллээх учуутал дии санаатым, ол эрэн үөрэнээччилэр кинини убаастыыллар, сөбүлүүллэр диэн бэлиэтии көрдүм.
Атын сүрүн оруоллары көрдөхпүнэ, Кеша Попов оруолун толорбут С.П. Данилов аатынан Бэрдьигээстээх оскуолатын 10-с кылааһын үөрэнээччитэ Тимур Мордискин, Саша Мандаров оруолун толорбут С.П. Данилов аатынан Бэрдьигээстээх оскуолатын 10-с кылааһын үөрэнээччитэ Тимур Егоров олус итэҕэтиилээхтик оонньоотулар. Оҕолор сыанаҕа тахсан, тутталлара-хапталлара, оруолларын иһигэр киирэн, көрөөччүгэ тиэрдиэхтээхтэрин тиэрдэн, дьон биһирэбилин ылыан ыллылар.
Ол курдук, Кеша Попов оруолун толорбут Тимур Мордискин санаатын үллэстэр:
Мин Кеша оруолун оонньообутум. Бу спектакль мин инники көрүүбүн уларытта. Кеша диэн дьиҥнээх, ис сүрэҕэ ыраас, эрэллээх уол. Кини санаата уонна олоҕун сыала-соруга кимнээҕэр да чугас буолла бэйэбэр. Кеша олоҕу хайдах көрөрө – ол миэхэ ордук сөп түбэстэ. Кини тулуура, дьоҥҥо итэҕэлэ уонна хайдах толкуйдуура – барыта саха киһитин үтүө өрүтэ. Спектакль кэнниттэн хас да күн санаабар Кеша саҥара сылдьыбыта, ол эрээри мантан өссө элбэҕи үөрэнним. Онон мин «Кэрэ Кэм» спектакльга кыттыбыппыттан олох үчүгэй эрэ санаалаахпын.
Салгыы Айта оруолун толорбут Варя Мандарова ахтыыта:
Мин А.Н. Осипов аатынан Бэрдьигэстээх орто оскуолатын 10 кылааһын үөрэнээччитэбин. В.С. Яковлев-Далан суруйбут «Дьикти Саас» сэһэнинэн «Кэрэ Кэм» спектакльга кыттан олус астынным. Мин Айта оруолун толорон, урукку кэмҥэ оскуоланы бүтэрбит оҕолор олохторун, үөрүүлэрин-көтүүлэрин биллим. Бу спектакльга кыттыыны ылбыт оҕолор бары оруолларын үчүгэй баҕайытык оонньоотулар. Елизавета Иевнаҕа барҕа махталбын тиэрдэбин. Бу спектакльы туруоран, быһааран, оруолбутугар хайдах киириэхтээхпитин үөрэтэн-такайан биэрбитэ. Оҕолорго баҕарыам этэ салгыы маннык курдук тыйаатыр туруоруутугар кыттыыны ылалларыгар.
Чахчы даҕаны, испэктээк көрөөччүгэ аҕыйах чаастаах туруоруу курдук көстөр, ол эрэн туруоруута, сценарийа, артыыстары кытта биир тылы булуута, кинилэр оруолларыгар киирэллэригэр үлэтэ баһаам, улахан сыраны ирдиир.
Испэктээк ис тутулун биллим, кыра да оруолу оонньообуппуттан астынным, дуоһуйдум.
Виктория Колодезникова, С.Данилов аатынан Бэрдьигэстээх оскуолатын омук тылын учуутала, «Сайдам» медиакиин салайааччыта