Өрөспүүбүлүкэ күнүн көрсө Дьокуускай куорат 2 №-дээх национальнай политехническай оскуолатыгар алын сүһүөх кылаас үөрэнээччилэрин дуобакка XV турнирдара СӨ үтүөлээх тренерэ, дуобакка ССРС спордун маастара, СӨ үөрэҕириитин, физическэй култууратын уонна спордун туйгуна Василий Иннокентьевич Кононов көҕүлээһининэн ситиһиилээхтик ааста. 2 №-дээх оскуолаҕа кини 1988 сылтан дуобат куруһуогун, сиэксийэтин утумнаахтык салайар. Оскуола кэлэктиибэ уонна үөрэнээччилэрэ бу оскуолаттан иитиллэн тахсыбыт норуоттар икки ардыларынааҕы гроссмейстер Николай Гермогеновынан чахчы киэн тутталлар. Кини сахалартан бастакынан 100 харахтаах дуобакка Россия чемпиона, норуоттар икки ардыларынааҕы гроссмейстер.
Үгэс буолбут дуобат күрэҕэ саҕаламмытынан оҕолорго бэйэлэрин эҕэрдэлэрин оскуола дириэктэрэ, ыстаҥаҕа уонна хотугу многоборьеҕа өрөспүүбүлүкэ чемпионатын хас да төгүллээх призера, спорт маастарыгар кандидат Василий Владимиров, спортивнай резервэни бэлэмниир өрөспүүбүлүкэтээҕи Киин дириэктэрэ Александр Бугаев, саахымат, дуобат өрөспүүбүлүкэтээҕи Киинин дириэктэрэ, дуобакка аан дойду чемпиона, норуоттар икки ардыларынааҕы гроссмейстер Матрена Ноговицына, дуобакка ССРС спордун маастара, СӨ үтүөлээх тренерэ, СӨ үөрэҕириитин, физическэй култууратын уонна спордун туйгуна, күрэхтэһии кылаабынай судьуйата Василий Кононов тириэртилэр.
VII “Б” кылаастар (кыл.сал. С.С.Павлова) оскуола гимнин, IV “В” кылаас үөрэнэччилэрэ “Сайылык оҕолоро” үҥкүүлэринэн уонна “Күн бытархайа” ырыаларынан (кыл.сал. П.М.Федорова), “Күөх дуол” ырыаларынан I “В” кылаас ансаамбыла (кыл.сал. С.П.Игнатьева) кыттан, турнир үөрүүлээх арыллыытын лаппа киэргэттилэр, сэргэхситтилэр. Турнир үөрүүлээх аһыллыытын IX “Б” кылаастан Даяна Лукина, VII “Б” кылаас үөрэнээччитэ Руслан Буртахов иилээн-саҕалаан ыыттылар.
Минньигэс ас сытынан дыргыйан турбут остолобуойга барыта 18 кылаас дуобатчыттара күөн көрүстүлэр. Хамаандаҕа оҕолору сэргэ биир төрөппүт (ийэ, аҕа, биитэр эбээ, эһээ) киирэн оонньоото. Эрийсиилээх күөн күрэскэ I “А” кылаас үөрэнээччилэрэ кыайан, үөрүү долгунугар уйдардылар!
Төрөппүттэр өйөбүллэрэ суолталаах
Матрена Николаевна Зыкова, кыайыылаах I “А” кылаас салайааччыта санаатын үллэһиннэ:
— Былырыыҥҥыттан биһиги оскуола “Классы ХХI века” диэн бырайыакка киирбитэ. Бу бырайыак чэрчитинэн кыра кылаастан оҕону точнай наукаларга тардыы, интэриэһи үөскэтии диэн МФТИ программатынан үс эбии предметтээхтэр: “Занимательная математика”, “Занимательная физика”, “Юный натуралист”. Ону таһынан маҥнайгы кылаастарга барыларыгар Василий Иннокентьевич Кононов эбии дьарыгы ыытар. Онон оҕолор араас сиргэ дуобатынан дьарыктаналлар. Холобур, Айаал Егоров убайын кытары Россия таһымнаах күрэхтэһиигэ кыттан кэлбитэ. Хамаандабытыгар Айаал Егоров, Айтал Ефимов, Диана Борисова, Света Трофимова эһэтэ Иннокентий Иннокентьевич Игнатьев бааллара, кылааспыт чиэһин көмүскээтилэр. Дуобат, уопсайынан спорт киһиэхэ биэрэрэ элбэх: болҕомто, өй үлэтэ, тулуур, дьулуур сайдар. Утарылаһааччыҥ хайдах оонньууруттан инникини ундаардаан өтө көрүүгэ, бэйэ-бэйэни убаастаһыыга, бэрээдэккэ, уһуннук тулуйан олорорго, сатаан кыайтарарга эмиэ үөрэнэллэр. Кылаас оҕото бары хабылыктыыр, хаамыскалыыр. Маныаха дьарыгы Анжела Тимофеевна Андросова ыытар. Уопсайынан, төрөппүттэр өйөбүллэрэ улахан оруоллаах, суолталаах. Кинилэр оҕо дьарыктанарын өйүүр, өйдүүр, комбинацияларын дьиэлэригэр ырытар буоллахтарына, ситиһии кэлэр. Айаал Егоровпыт сүүс харахтаах дуобакка Россияҕа 9 саастарыгар диэри саастаах уолаттарга III миэстэни ылбыта. Айаал саахымат-дуобат өрөспүүбүлүкэтээҕи Киинигэр Федора Игоревна Иванова диэн тренердээх.
Дьоҕус кабинета толору оҕо буолар
Төрөппүт Алина Семеновна Егорова:
—Сылын аайы биһиги оскуолабытыгар дуобат турнира үрдүк таһымнаахтык ааһар. Оскуола тренерэ Василий Иннокентьевич Кононов оҕолорго олус кыһамньылаахтык барытын тэрийэр. Онон сыл аайы дуобат бырааһынньыга аттыбытыгар тэриллэриттэн биһиги, төрөппүттэр уонна оҕолор үөрэбит эрэ. Оскуола күрэхтэһиитигэр кыттыбыппыт быйыл үһүс сыла. Улахан уолбут III кылааска үөрэнэр, аҕабыт эмиэ турнирга кыттааччы. Ааспыт сылларга II, III миэстэ буолбуттара. Дуобат оҕону дьиссипилиинэҕэ, кыайыыга, кыайыыга дьулуурга үөрэтэр. Оҕолорбут биэбэйиккэ эрдэхтэриттэн дуобатынан умсугуйан туран дьарыктаналлар. Үгүс доҕоттордоннулар. Билигин кэтээн көрдөхпүнэ, өйтөн ааҕа үөрэтэллэрэ чэпчэкитик бэриллэр. Оскуола программатын ыарырҕаппаттар, барытын ситиһэллэр. Василий Иннокентьевич оҕолору кытары үлэлииргэ улахан үөрүйэхтээҕэ биллэр. Бэйэтэ да үчүгэйдик оонньуур, программаны да өйдөбүллээхтик биэрэр. Оскуолаҕа анал кабинеттаах. Ол дьоҕус кабинета мэлдьи тобус-толору оҕо буолар!
ххх
II, III миэстэлэри III “Г (кыл.сал. Д.Н. Алексеева) уонна III “А” кылаас (кыл.сал. В.С.Аргунова) үөрэнээччилэрэ ылан, эмиэ ситиһии үөрүүтүн биллилэр. Кыайыылаахтар бары Кубоктарынан, мэтээллэринэн, Хайҕал суруктарынан, харчынан наҕараадаланнылар. Турнир суола-ииһэ суох хаалбакка, инникитин эдэр кэскиллээх дуобатчыттар ааттара ааттанарыгар саарбаҕа суох.
Жанна Леонтьева.
Кэскил14.ру