Муус устар 27 күнүгэр — Өрөгөйдөөх Саха Өрөспүүбүлүкэтин тэриллиитин үөрүүлээх күнүгэр, Лөгөй лиссиэй-интэринээтигэр Саха национальнай байыаннай оскуола знамятын копиятын көрсөр бэлиэ тугэн буолан ааста. Быйыл 2026 сылга байыаннай оскуола төрүттэммитэ 100 сылыгар анаан СӨ үөрэҕин уонна наукатын министиэристибэтэ өрөспүүбүлүкэтээҕи эстафетаны тэрийдэ. Уус-Алдаҥҥа Суотту, Тумул бөһүөлэктэригэр сылдьан, Кэптэнигэ кэллэ.
Бу эстафетаны улуустааҕы бэтэрээннэр сэбиэттэрин бэрэссэдээтэлэ, улуус аҕа баһылыгын сүбэһитэ Иван Иванович Колодезников салайан, Бороҕон нэһилиэгиттэн улахан делегация байыаннай оскуола былааҕын күөрэччи көтөҕөн аҕалан туттарда. Лөгөй нэһилиэгин дьоно-сэргэтэ, оҕолоро үрдүк таһымҥа үөрүүлээх быһыыга-майгыга көрүстүбүт. Ыалдьыттары көрсүһүүгэ Лөгөй нэһилиэгин баһылыга Николай Николаевич Попов Саха Өрөспүүбүлүкэтин күнүнэн эҕэрдэлээн туран, хас биирдиибит киэн туттар дьоммутун холобур оҥостон үтүө, эппиэтинэстээх киһи буола улаатарбытын туһунан эттэ. Лиссиэйбит аатыттан мин знамяны көрсүү умнуллубат түгэн буоларын бэлиэтээн, харда этиибин оҕолор «Уруй!», «Айхал!»диэн өйөөтүлэр.
Тэрээһин тэрийиитигэр Уус-Алдан улууһугар курус күн биллэриллибитинэн, Анал байыннай дьайыы дьоруойугар Алексей Рафаэлович Петров уонна Анал байыннай дьайыы кыттыылааҕар, Лөгөй оскуолатын выпускнигар Геннадий Валерьевич Андросов сырдык тыыннарын кэриэстээн, чуумпуран туруу тэриллиннэ.
Көрсүһүүгэ Иван Заболоцкай, Гаврил Васильевич Егоров аатынан Мүрү 1 нүөмэрдээх орто оскуолатын 10 «а» кылааһын үөрэнээччитэ, Саха национальнай байыаннай оскуола туһунан «Наши земляки-воспитанники Якутской национальной военной школы” чинчийиитин билиҺиннэрдэ. Оттон Сэһэн Ардьакыап аатынан улуустааҕы кыраайы үөрэтэр музей исписсэлииһэ Айаал Кэскилович Бурцев «Сыны Усть-Алдана выпускники Якутской военной школы на службе Отечеству” тиэмэҕэ бэйэтин научнай үлэтиттэн сырдатта.
Саха национальнай байыаннай оскуола тэриллиитин 100 сылыгар анаммыт, знамяны көрсүү тэрээһинэ, 4 кылаас уоланнарын толоруутугар “Албан аат” ырыа доҕуһуолунан түмүктэннэ.
Улуу Кыайыыны уһансыыга улахан суолталааҕын өйдүүбүт. Манна үөрэммит биир дойдулаахтарбытынан киэн туттабыт, кинилэр өй-санаа, күүс-уох өттүнэн кыахтаах этилэр диэн ханна да сырыттарбыт киэн тутта кэпсиэхтээхпит, сырдатыахтаахпыт. Байыаннай үөрэх суолтата олус улахан, кини сайдыытыттан дойдубут тутула тутулуктаах. Дойдубут историятын умнумуоҕун диэн эдэр ыччаты ыҥырабыт!
Янис СЫСОЛЯТИН,
Лөгөй лиссиэй-интэринээтин «SiTiM LegMedia» юнкора, Уус Алдан