Кыыс оҕо араас дьарыктаах буолар: үҥкүү, уруһуй, иистэнии, баайыы… Онтон ураты дьарыктаах кыргыттар эмиэ бааллар. Олор истэригэр Дьөһөгөй оҕотун доҕор оҥостубут Үөһээ Бүлүү улууһун Тамалакаан орто оскуолатын 5 кылааһын үөрэнээччитэ Сайнаара Саввинова.
Сайнаара аҕата Александр Семенович сылгыһыт. Кыыһын отой кыра эрдэҕиттэн сылгыга батыһыннара сылдьан сыһыарбыта. Ийэтэ Марианна Афанасьевна — оҕо уһуйаанын иитээччитэ.
Сайнаара кэпсиир:
— Мин Саввиновтар дьиэ кэргэн саамай кыра кыыстарабын. Аҕам кыра эрдэхпиттэн батыһыннара сылдьан Дьөһөгөй оҕотугар сыһыарбыта. Аты миинэри ис-испиттэн сөбүлүүбүн, туохтааҕар да ордоробун. Дьөһөгөй оҕолорун кэрэ дьүһүннэрин, холку майгыларын сөбүлүүбүн. Сахабыт сылгыта сымнаҕас майгылаах, тыйыс тымныы кыһыммытын, аһаҕас халлаан анныгар сылдьан, кыһыны туоруур, олус тулуурдаах. Мин сылгыларым миигин өйдүүллэр уонна истэллэр. Маҥнай убайдарым ат миинэллэрин, сүүрдэллэрин көрөн наһаа ымсыырарым уонна кинилэр курдук ат сүүрдүөм диэн баҕа санаалаах улааппытым. Билиҥҥитэ ат сүүрдэргэ эрчиллэ сылдьабын. Маны таһынан саха сылгытын туһунан чинчийэр үлэлээхпин, ол онон НПК-ларга кыттабын.
Сайнаара маны таһынан, сылгыларын кытары алтыһарын барытын төлөпүөҥҥэ түһэрэн, уһулан бэйэтин социальнай страницатыгар үйэтитэн хаалларан иһэр. Саха сылгытын интэриэһиргиир дьон суруттарар, ыйыталаһар, кыыс барыларыгар хоруйдуур, «историяларга» даҕаны элбэхтэ видео устан тахсар. Олус интэриэһинэй!
Сайнаара баҕа санаата туолан, хаһан эмит, Ыһыахха, ат сүүрдүөҕэ диэн баҕара хаалыаххайыҥ.
Кэскил14.ру