Олунньу 28 күнүгэр Өксөкүлээх Өлөксөй аатынан норуоттар доҕордоһууларын дьиэтигэр Сунтаар улууһун Дьаархан нэһилиэгин “Одун” үҥкүү көрдөрүүлээх ансаамбылын (сал. В.В.Васильев) 20 сыллаах үбүлүөйдээх кэнсиэрэ буолан ааста.
Манна Лариса Иванова-Ырыа Дьаархан, Станислав Иванов, “Күлүм”, “Сардаана”, “Уран” ансаамбыллар, итиэннэ “Күндэл” үҥкүү норуодунай ансаамбыла, “Диаданс” үҥкүү бөлөҕө кытыннылар. Кэнсиэри Тускулаана Горохова-Кобельянова иилээн-саҕалаан ыытта. Ансаамбылга умсугуйан туран дьарыктанар оҕолор бэлиэтээһиннэрин ааҕыҥ.
Мин учууталым
Василий Васильевич Васильев — СӨ култууратын туйгуна, кулууппут дириэктэрэ, “Одун” көрдөрүүлээх ансаамбылын салайааччыта. Кини миигин үҥкүүгэ эрэ буолбакка, култуура арааһынай хайысхаларыгар эмиэ үөрэтэр. Мин икки улахан эдьиийдэрим эмиэ “Одуҥҥа” дьарыктаммыттара. Билигин оскуолаларын бүтэрэн, устудьуоннуу сылдьаллар.
Мин үҥкүүгэ алта сааспар киирбитим. Быйыл үҥкүүлээбитим сэттис сылым буолла. Билигин балтым эмиэ үҥкүүгэ сылдьар. Учууталбыт Василий Васильевич барыбытын дьону кытта аһаҕастык кэпсэтэргэ, санааны үллэстэргэ, ылыммыт сыалы ситиһэргэ үөрэтэр. Үнкүү киһини эт-хаан сайдыытыгар, өйгө-санааҕа, бэрээдэккэ, дьиссипилиинэҕэ барытыгар үөрэтэр диэн этэр.
Кини үөрэтэригэр олус ирдэбиллээх, интэриэһинэй, бэһиэлэй эмиэ буолар. Кыра эрдэхпититтэн араас тэрээһиннэргэ, күрэхтэргэ кыттабыт, араас сирдэргэ сылдьан, олус элбэх доҕоттордуннубут. Василий Васильевичка улахан махталбын биллэрэбин.
Айталыына Семенова, VII кылаас үөрэнээччитэ,
Дьаархан, Сунтаар.
«Одуҥҥа» — дьиэ кэргэнинэн
Биһиги дьиэ кэргэммит бары «Одун» үҥкүү ансаамбылыгар сылдьыбыппыт. Салайааччыбыт Василий Васильевич Васильев диэн. Кини олус үчүгэй, барыбытыгар тэҥҥэ болҕомтотун уурар. Сороҕор ирдэбиллээх буолар. Ансаамбылбытынан Саха сиригэр эрэ буолбакка, атын дойдуларга эмиэ үңкүүлүү барааччыбыт!
Биһиги дьиэ кэргэнтэн «Одун» ансаамбылга ийэм, Екатерина Владимировна «Одун» бастакы үөрэнээччилэриттэн биирдэстэрэ. Кини биһиэхэ мэлдьи сүбэлиир, көмөлөһөр. Аҕам Арсен Анатолиевич «Дьөһөгөй» диэн үҥкүү бастакы солиһа. Кини биһиэхэ холобур буолар. Ийэбит уонна аҕабыт биһиэхэ үҥкүү эйгэтигэр киирэргэ көмөлөһөллөр.
Мин убайбын Тускулу батыһан «Одуҥҥа» киирбитим. Тускул эмиэ ансаамбыл биир бастыҥ солиһа. Аҕам курдук, кини эмиэ «Дьөһөгөй» үҥкүүгэ солистаабыта. Билигин Тускул Дьокуускайга Култуура уонна ускуустуба кэллиэһигэр үҥкүүгэ II кууруска үөрэнэр. Аны игирэм аҥаара Арчыл, алын кылааска сылдьан «Одуҥҥа» сылдьыбыта. Онтон спортивнай оскуолаҕа үөрэнэ Сунтаарга киирбитэ. Арчыл билигин өрөспүүбүлүкэ, Уһук Илин боксаҕа чөмпүйүөнэ. Арассыыйаҕа тиийэ күрэхтэһэр.
Быраатым Туйгун эмиэ V кылааска диэри «Одун» ансаамбылга үҥкүүлээбитэ. Кини эмиэ спортивнай оскуолаҕа Сунтаарга үөрэнэ киирбитэ. Туйгун боксаҕа өрөспүүбүлүкэҕэ миэстэлээх.
Үҥкүүнэн дьарыктанарбыт эппит-хааммыт сайдарыгар улахан оруоллаах. Хайа баҕарар спорт көрүҥэр үчүгэйдик бэлэмнэнэргэ уонна санаабыт күүстээх, тулуурдаах буоларыгар көмөлөһөр эбит. Ол иһин Арчыл уонна Туйгун үҥкүүлээн баран, маннык үчүгэй спортсменнар буолбуттара буолуо дии саныыбын. Үҥкүү киһини бары өттүнэн бэлэмниир эбит. Үҥкүүгэ сылдьан мин олус элбэҕи биллим, саҥа дьону кытта билистим. Ансаамбылга киирэн баран үгүс доҕоттордоннум. Араас дойдуларга сылдьан, атын омуктары көрөн-истэн сайынным.
Мин баҕарыам этэ, «Одун» үҥкүү ансаамбыла өссө да уһуннук үлэтин салҕаатын, өссө элбэх ситиһиилэр кэлэ турдуннар диэн.
Айгыына Павлова, IX кылаас үөрэнээччитэ,
Дьаархан, Сунтаар.
Тоҕус сыл ааһа охсубут
Мин “Одун” ансаамбылга маҥнайгы кылаастан дьарыктанабын. Ол аата, номнуо тоҕус сыл ааһа охсубут. «Одуҥҥа» киирэн дьарыктаныахпыттан араас норуоттар үҥкүүлэрин биллим. Биһиги сири-дойдуну кэрийдибит, ол дойдулар култуураларын билсэн, элбэҕи биллибит, оҕолору кытта билсэн доҕордостубут. Үнкүүгэ сылдьар миэхэ элбэҕи биэрдэ дии санаабын: эт-сиин сайдар, өй-санаа уларыйар. Хас биирдии “Одун” ансаамбылга алтыспыт оҕолорум үгүстэрэ култуура өттүнэн үөрэххэ барбыттара. Мин эмиэ инникитин кэрэ эйгэтин хайысхатынан үөрэниэхпин баҕарабын.
Кэскил Иванов, Дьаархан, Сунтаар.
Ордорор үҥкүүлэрим
Мин “Одун” үҥкүү бөлөҕөр I кылаастан сылдьабын. Элбэх үҥкүүттэн саамай ордорорум “Оһуор” уонна “Чороонноох”. Бу үҥкүүлэри саамай элбэхтик толоробут. Биир дойдулаахпыт С.А. Зверев-Кыыл Уола “Оһуор” үҥкүүтүн аан бастаан биэбэйик улахан бөлөҕөр сылдьан, “Айан” күрэххэ толорбутум. Репетицияҕа барытыгар сылдьыбытым эрээри, аһара кыра диэн миигин үҥкүүлэппэтэхтэрэ. Бэлэмнэнии бөлөҕүн уонна маҥнайгы кылаастары ылбыттара. Ону мин күрэх буола турдаҕына, аллараа туран барытын үҥкүүлэспитим. Дьүүллүүр сүбэ дьоно миигин көрөн олорбут этилэр уонна “Туйгун” сыананы туруорбуттара. Арааһа, ол иһин билигин сөбүлүүр үҥкүүм буоллаҕа.
“Чороонноох” үҥкүүгэ наһаа үчүгэй саҥа таҥастаахпыт. Бу үҥкүүнү практикаҕа кэлбит хореографтар Анналаах Мария үөрэппиттэрэ. Бэйэбэр сөп түбэһэр үҥкүү дии саныыбын, ол иһин наһаа сөбүлүүбүн.
Айаал Николаев, IX кылаас үөрэнээччитэ,
Дьаархан, Сунтаар.
Владислав Коротов түһэриилэрэ.
Кэскил14.ру