Аҕа дойду Улуу сэриитин бэтэрээнэ, педагогическай үлэ бэтэрээнэ, Саха АССР оскуолаларын үтүөлээх учуутала, РСФСР норуотун үөрэҕириитин туйгуна, педагогическай наука кандидата, Н.К. Крупская аатынан мэтээл кавалера, С.Новгородов аатынан бириэмийэ лауреата Игнатий Иванович Каратаев — Саха сирин чулуу дьонуттан биирдэстэрэ. Кини – учуутал, буойун, учуонай.
Игнатий Иванович Каратаев 1923 сыллаахха тохсунньу 15 күнүгэр Бүлүү оройуонун Тааhаҕар нэhилиэгэр төрөөбүтэ. Тааhаҕар начаалынай оскуолатыгар 1931 сыллаахха аҕыс сааhыгар үөрэнэ киирбитэ. Оскуоланы бүтэрээт, 1940 сыллаахха Бүлүү куоратыгар үс ыйдаах учуутал курсун бүтэрбитэ. Ол курдук улэлии сырыттаҕына олунньуга Өкүндү оскуолатыгар көһөрбүттэр, үөрэх дьылын түмүктээн баран Тааhаҕар оскуолатыгар төттөрү кэлэн учууталлыыр. 1941-42 үөрэх дьылын түмүктүүр.
1942 сыл бэс ыйыгар Аҕа дойду Улуу сэриитигэр ыҥырыллыбыт – бэбиэскэ туппута. Арҕааңы фроҥҥа сэриилэһэр. 7 кылаас үөрэхтээх уонна учуутал буолан сэриилэһэрин быыһыгар үөрэнэн, младшай командир званиеланар. Воронеж куорат таһыгар кыргыһыыга ньиэмэс гранататын үлтүркэйэ икки уллуҥахтарын дьөлүтэ түһэн бааһырар. Иккиһин Днепры туорааһын иһин историяҕа киирбит улахан кыргыһыыга «Тараҕай» үрдэли ылыыга оскуолак моонньугар түһэн кыл тыыннаах хаалар. Ол курдук, сэриилэһэн Улуу Кыайыыны Оломоуц диэн Чехословакия куоратыгар көрсөр. 1946 сыл олунньутугар демобилизацияланан төрөөбүт дойдутугар этэҥҥэ эргиллэн кэлэр.
Игнатий Иванович дойдутугар кэлээт, 1946-47сс. үөрэх дьылыттан РайОНО анааhынынан үөрэммит оскуолатыгар сэбиэдиссэйинэн анаммыта. 1948 сыллаахха кэтэхтэн үөрэнэн Бүлүүтээҕи педучилищены бүтэрбитэ. 1951 сыллааҕы олохтоох сэбиэттэр быыбардарыгар оройуон сэбиэтин депутатынан Бороҕоннооҕу быыбардыыр уокуруктан талыллан турбута. Ити кэннэ Бүлүү араас оскуолаларыгар учууталлыыр, райсовет сэкэрэтээринэн, РайОНО инспекторынан үлэлиир.
Игнатий Иванович төрөөбүт тылын үөрэтэр баҕаттан Саха государственнай университетын саха салаатыгар киирэн үөрэнэр. Бу үөрэҕин 1963 сыллаахха бүтэрэр. Республика араас улуустарыгар саха тылын учууталынан, директорынан үлэлиир.
1966 сылтан 1989 сыллаахха пенсияҕа тахсыар дылы РСФСР Υөрэҕин Министиэристибэтин Дьокуускайдааҕы филиалын национальнай оскуолалар проблемаларын чинчийэр институтугар научнай сотруднигынан үлэлиир. Оскуолаҕа саха тылын уонна литературатын үөрэтэ сылдьан, Игнатий Иванович оскуолаларга төрөөбүт тылы үөрэтии ордук алын сүһүөх кылаастарга быстар мөлтөх туруктааҕын билбитэ. Бу дьыалаҕа кини хайа эмэ өттүнэн ылсан үлэлиир баҕа санаалааҕа. Ол ыра санаата бу институкка үлэлиир кэмигэр туолбута. Манна кини чинчийэр үлэтин сүрүн темата «Алын сүҺүөх кылаастарга төрөөбүт тылы үөрэтии ис хоhооно уонна методиката». 1982 с. «Лингвистические основы обучения орфографии родного языка в начальных классах» диэн кандидатскай диссертациятын көмүскээн учуонай буолар. Кини бу дьоһун чинчийиитэ начаалынай үөрэхтээһиҥҥэ бигэ акылаат буолар.
Игнатий Иванович салалтатынан саха тылыгар оҕону 6 сааһыттан үөрэтэр толору учебно-методическай комплект бэлэмнэнэн тахсыбыта. Кини үөрэх кыра саастаах оҕону салыннарбакка, чэпчэкитик бэриллиэхтээх диэн ирдэбилинэн салайтаран, алта саастаах оҕолорго, «Азбука» оҥорон, ол кэмҥэ эксперименнээн дакаастаабыта. Билиҥҥи көлүөнэ кырачааннар, бу кинигэни, билии күлүүһэ оҥостон, күн бүгүҥҥэ диэри үөрэнэ сылдьаллар. Игнатий Иванович тыл лингвистическэй төрүттэрин чинчийбит учуонай буолан, хас биирдии дорҕоон, буукуба ураты оҥоһуулааҕын билэр
уонна ону оҕолорго тиэрдэр суолу тобулар улахан учуонай.
Каратаев Игнатий Иванович 50-тан тахса научнай үлэ, оскуола программатын, учебник, учебнай пособиялар уонна ыстатыйалар, ахтыы кинигэлэр автордара. Кини өр сылларга иитиэхтээн сылдьыбыт идеятын олоххо киллэриигэ үтүө суобастаах үлэтэ Н.К. Крупская аатынан мэтээлинэн бэлиэтэммитэ.
Игнатий Иванович барыта 13 сыл устата учууталлаабыта, 22 сыл устата Национальнай оскуолалар институттарын филиалыгар научнай сотруднигынан үлэлээбитэ.
2014 сыл ахсынньы 17 күнүгэр 91 сааһыгар сылдьан күн сириттэн күрэммитэ. Үөрэппит оҕолоро билигин ыал эһээлэрэ, эбээлэрэ. Чахчы үлэтигэр бэриниилээх, оҕолору таптыыр, убаастыыр учуутал буолан үөрэппит оҕолорун олохторугар биир эмиэ үчүгэй киһини кытта алтыспыттарын туһунан үтүө эрэ өйдөбүлү хааллардаҕа.
Биһиги биир дойдулаахпытынан Игнатий Иванович Каратаевынан киэн туттабыт. Кини олорбут, үлэлээбит олоҕо кэнчээри ыччакка үтүө холобур эрэ буолар.