Морполуогуйаны баһылаабыт, сиинтэксиһи сиһилээбит, арпагыраапыйаны олохтоспут, сурук бэлиэтин соҕотох суута, саха тылын үөрэҕин минэ гынан мииммит, айымньылаах үлэни ат гына көлүммүт саха биир саарына — Лука Никифорович Харитонов.
Л.Н.Харитонов аатын сүгэр Маҕарас орто оскуолатын үөрэнээччилэрэ кини туһунан билэрбит булгуччулаах уонна наадалаах. Кини кимий?
Аатырар-сураҕырар Улуу Сыһыыга 1901 с. үөрэҕэ суох дьадаҥы ыалга күн сирин көрбүтэ. Улуу Сыһыыга баар таҥара дьиэтигэр церковнай-приходской оскуоланы Лука Харитонов төрүттэрэ арыттаран, элбэх оҕону үөрэх-билии аартыгар угуйбуттара. Аан бастаан бу оскуоланы бүтэрбит 7 оҕоттон биирдэстэрэ Лука Никифорович буолар. Намҥа 2 кылаастаах оскуоланы, Дьокуускайдааҕы педтехникуму, Крупская аат. Коммунистическай иитии академиятын бүтэрбитэ. Саха оскуолалара сайдарыгар олук уурбута, элбэх саха тылын кинигэлэрин таһаарбыта. Нуучча-саха тылын тылдьытын, саха тылын учебникатарын оҥорбут, элбэх оҕону саха тылын абылаҥар уһуйбут уһулуччулаах киһинэн биллэр. Лука Никифорович 60-тан тахса научнай үлэ ааптара. Онон биһиги оҕолор, киэн туттуохтаахпыт маннык улуу, чулуу, дьоһун киһи аатын сүгэр оскуолалаах буоларбытынан.
Саха тыла сайдарыгар элбэх кылаатын киллэрбит, Саха сиригэр эрэ буолбакка, Арассыыйаҕа, онтон да атын тас дойдуларга биллибит, сахалартан биир бастакынан аатырбыт учуонай аатын үйэтитэр сыаллаах 2001 с. ахсынньы 3 күнүгэр СР 1745№-дээх дьаһалынан Маҕарас орто оскуолатыгар Л.Н. Харитонов аата иҥэриллибитэ.
Олоҕун бүтүннүүтүн наукаҕа анаабыт биир уһулуччулаах учуонайбыт, биир дойдулаахпыт Л.Н. Харитонов өрөгөйдөөх күнүнэн эҕэрдэ буолуохтун. Биһиги Лука Харитонов аатынан Маҕарас орто оскуолатын үөрэнээччилэрэ, Харитонов сыдьааннара кини аатын ааттатар үөрэҕи өрө тутар бастыҥ ыччаттар буолуохтаахпыт.
Оскуолабыт сайдарын туһугар бүттүүн турунан иннибит диэки эрэллээхтик хаамыахтаахпыт!
Сиһилии: