Тохсунньу 31 күнүгэр кэккэ предметтэри дириҥэтэн үөрэтэр С.П. Данилов аатынан Бэрдьигэстээх орто оскуолатын актыыбынай саалата сыл аайы ыытыллар «100 бастыҥ үөрэнээччи» диэн үөрэххэ, спортка, кэрэ эйгэҕэ, үлэҕэ бастыҥтан бастыҥ үөрэнээччилэри уонна кинилэр төрөппүттэрин тобус-толору муста.
Тэрээһин үөрүүлээх чааһыттан саҕаламмыта, манна үөрэх сылын устата үчүгэй көрдөрүүнү, көхтөөх олоҕу уонна билиигэ тардыһыыны көрдөрбүттэри чиэстээтилэр. Оскуола дириэктэрэ эҕэрдэ тыл эттэ, үөрэнээччилэр оскуола эрэ буолбакка, төрөөбүт нэһилиэктэрин, улуустарын уонна өрөспүүбүлүкэ инники кэскилэ буолалларын бэлиэтээтэ.
Үөрүүлээх быһыы-майгы ураты суолтатынан оскуоланы бүтэрбит выпускниктар уонна олохтоох меценаттар 41 туйгун үөрэнээччилэргэ стипендиялары туттарыылара буолла. Бу үтүө үгэс көлүөнэлэр икки ардынааҕы ситимнэрин үөскэттэ, ситиһии уонна махтал болдьоҕо суох буоларын көрдөрдө. Туйгун үөрэнээччилэр үбүнэн эрэ өйөбүлү ылбакка, кинилэр сыралаах үлэлэрэ сыаналанар, кинилэргэ итэҕэйэллэр диэн өйдөбүлү хаалларда.
Наҕараадалааһын чыпчаалынан 4-тэн 11-с кылаастарга диэри бастыҥ үөрэнээччилэргэ анал статуэткалары туттарыы буолла. Тоҕуоруһа мустубут дьон күүстээх ытыстарын тыаһынан сүүс үөрэнээччи төрөппүттэрин кытары сыанаҕа таҕыстылар. Бастыҥ үөрэнээччилэр төрөппүттэригэр махтал суруктары туттардылар. Төрөппүттэр – ханнык баҕарар ситиһии төрүтэ.
Тэрээһин соһуччу түгэнинэн — эстрада биир бастыҥ чаҕылхай ырыаһыттара Радивер уонна Замир буоллулар. Кыралыын улаханныын сөбүлээн истэр ырыаларбыт сааланы дьикти алыбынан толордулар, бэл, төрөппүттэрбит астына-дуоһуйа үҥкүүлээтилэр.
Бу умнуллубат киэһэни фуршетынан түмүктээтибит. «Саламаат» тэрилтэ тотоойу астарынан, минньигэс утаҕынан күндүлээтэ. Оҕолор, төрөппүттэр, учууталлар тото-хана аһаан баран тарҕастылар.
С.П. Данилов аатынан Бэрдьигэстээх оскуолатыгар «100 бастыҥ үөрэнээччи» бырааһынньыга үтүө үгэскэ кубулуйан, сылын ахсын чаҕылхай оҕолору чиэстиирэ, төрөппүттэргэ махтанара олус кэрэхсэбиллээх. Бу – үлэни сыаналыыр, талааны өйүүр уонна ситиһиилээх үгэстэри үөскэтэр үтүө бачыым. Бу тэрээһин чаҕылхай, дьоҕурдаах, өйдөөх-санаалаах оҕолору өйөөһүнэ, сыаналааһына буолар.
Сиһилии:
Сайаана Попова, С.П. Данилов аатынан орто оскуола 8 «в» кылааһын үөрэнээччитэ, Горнай