Тохсунньу 29 күнүгэр Дьокуускай куоратын 17 нүөмэрдээх орто оскуолатыгар бэлиэ күн буолан ааста. Куоракка «Патриот” диэн биир кэрэ көстүүлээх кииҥҥэ биһиги оскуолабыт 100-тэн тахса үөрэнээччилэригэр аналлаах «Хорсун быһыы чааһа” ыытылынна. Көрсүһүүгэ ыҥырыылаах ыалдьытынан — Арассыыйа дьоруойа А.Н.Григорьев – Тута, анал байыаннай дьайыы кыттыылааҕа, «Патриот”киинин патриотическай иитиигэ салайааччыта, снайпер П.Е Аржаков, “Патриот” эдэр ыччат киинин дириэктэрэ, анал байыаннай дьайыы бэтэрээнэ С.В.Заболоцкай кэллилэр. Бу тэрээһини иилээн-саҕалаан ыыттылар: оскуолабыт иитэр үлэҕэ завуһа Борисова О.И, дириэктэр сүбэһитэ Максимова А-К.А.
Үгэс быһыытынан, үөрүүлээх түгэни Макарова Н.Я салайааччылаах оскуолабыт ырыа ансаамбыла Ийэ дойдубут Өрөгөй ырыатынан астылар. Көрсүһүүгэ кэлбит ыалдьыттарбыт ирэ-хоро оҕолордуун, учууталлардыын кэпсэтэн, ыйытыыларга хоруйдаан, истээччилэр болҕомтолорун тартылар. Бары даҕаны кыра эрдэхтэриттэн спорт араас көрүҥнэрин, ордук национальнай атах оонньууларын сэргиир, математика, физика, информатика курдук ыарахан биридимиэттэри олус сөбүлээн үөрэппит эбиттэр. Учууталларын билиҥҥи диэри истиҥник санаан, ахтан аастылар. Эдэр көлүөнэ ыччакка ордук чөл олоҕу тутуһалларыгар, араас дьааттаах аһынан үлүһүйбэккэ (доширак, кока-кола, энергетик), табааҕы тардыбакка (вейп) о.д.а куһаҕан дьаллыкка ылларбакка, доруобуйаларын көрүнэ сылдьалларыгар ыҥырдылар. Бу уоттаах, өлүүлээх сэриигэ киһи ордук олоҕу сыаналыыр буоларын, эт-хаан өттүнэн чэгиэн, күүстээх, хорсун санаалаах буоллаххына тыыннаах эргиллэн кэлэр дьол буоларын эттилэр.
Биир долгутуулаах түгэнинэн 8 кылаас оҕолоро саастарын ситэн, маҥнайгы дөкүмүөннэрин Арассыыйа дьоруойун илиититтэн туппуттара буолар. Манна үчүгэй үөрэхтээх, оскуола олоҕор көхтөөхтүк кыттар актыбыыс оҕолорбут: Варламова Виолетта (VIII в), Бурнашев Андрей (VIII в), Габышев Илья (VIII в), Дягилев Эрхан (VIII а), Нюргусов Аман (VIII а), Юмшанов Михаил (VIII а) үөрүүлээх быһыыга-майгыга пааспардарын тутан, олохторугар биир кэрэ бэлиэ өйдөбүнньүк буолан хаалла.
Анал байыаннай дьайыы бэтэрээннэрэ оҕо аймах туһугар кыһаллар, үлэлии-хамсыы сылдьар дьон эбит диэн түмүккэ кэллибит. Бу саҥа аһыллыбыт “Патриот” киин эдэр үлэһиттэрэ оҕолору араас тэрээһиннэргэ, көрсүһүүлэргэ ыҥырдылар. Инникитин маннык көрсүһүүлэр өссө интэриэһинэйдик аастыннар.
Тая ОЛЕСОВА, Яна ВАСИЛЬЕВА,
Дьокуускай куоратын 17№ орто оскуолатын IX “в” кылааһын үөрэнээччилэрэ
keskil14.ru