Бүгүн биһиги оскуолабыт дириэктэриттэн Григорий Сысоевтан Саха сирин Ил Дарханын Айсен Николаев илдьитин ырытан комментарий ыллыбыт.
— Григорий Григорьевич, Ил Дархан илдьититтэн ордук тугу сэргии иһиттигитий? Бэйэҕит санааҕытын кытта үллэстиэххит дуо?
— Бэҕэһээ биһиги Ил Дархаммыт, Аҕа баһылыкпыт Айсен Сергеевич Николаев бэйэтин илдьитин тиэртэ. Сүрүн ыйыыта-кэрдиитэ бу барыбытыгар ориентирынан буолар, ол аата республика кэлэр сылга өссө хайдах сайдыахтааҕын туһунан кини тоһоҕолоон эттэ. Ол курдук республика олохтоохторо үрдүк хаачыстыбалаах олоххо олоруохтаахтар диэтэ. Социальнай сфераны сайыннарыы уонна анал байыаннай дьайыыга сылдьар буойуттарга, кинилэр дьиэ кэргэттэригэр, ыччакка, спорка уонна аҕам саастаах дьоҥҥо көмөнү, болҕомтону уурууга бэйэтин дьаһалын эттэ.
Сүрүн үлэни инфраструктура сайдыытыгар: дьиэлэри тутууга, суол оҥоруутугар ууруохха наада диэн тоһоҕолоон эттэ. Үөрэхтээһин уонна доруобуйа харыстабыла үрдүк хаачыстыбалаах буолууларын ситиһиэххэ наада диэн эттэ. Ол курдук сылтан сыл аайы оскуоланы бүтэрэр оҕолор биир кэлим эксээмэни 100 баллга туттараллара элбээн иһэр диэн иһитиннэрдэ. Ити эмиэ биир үчүгэй көрдөрүү буолар. Олохтоох экономиканы бөҕөргөтүөххэ диэтэ.
Тыа сиригэр территорияны сайыннарыыны өйүүрүн эттэ, ол аата биһиэхэ тыа сиригэр олохпут-дьаһахпыт сайдыытыгар биир улахан төһүү күүс буолуо. Ону таһынан мастер-план диэҥҥэ тохтоон ааста. Саха сиригэр 20-тэн тахса улуус бу программаҕа киирэн үлэлэһэ олорор. Ол эбэтэр улуустарынан, нэһилиэктэринэн комплекснай сайдыы буолар.
Хаҥаластарга биир үчүгэй сонун – Манчаары оонньуутун 2029 сылга үрдүк таһымнаахтык ыытыахха диэн эттэ. Сүрүннээн спорт сайдыыта киириэ, туризм, саҥа тутуулар, ону таһынан социальнай эйгэҕэ сайдыы барыа диэн хаҥаластар эрэнэ иһиттибит.
2026 сыл биһиэхэ култуура сылынан буолуо диэн эттэ. Култуура сылыгар Олоҥхо дыбарыаһа киириэ, ону таһынан культурнай памятнай көрүҥнэрибит сайдалларыгар туспа боҕломто ууруллан, улахан үлэ барыа диэн эрэнэ саныыбын. Бүтэһигэр: “Бары бииргэ кыайыыга, бары бииргэ кэскилгэ!” диэн этэн, илдьитин түмүктээтэ.
Ил Дархан кэлэр сылга республикаҕа, Бырабыыталыстыбаҕа уонна Ил Түмэҥҥэ сөптөөх соругу туруорда, онон иннибит диэки баран иһиэхпит диэн эрэнэбин.
Богдан Слепцов, М.Е.Васильева аатынан 2 Малдьаҕар орто оскуолатын 8 кылааһын үөрэнээччитэ, “УОТ” медиакиин