Сэтинньи 13 күнүгэр Саха Өрөспүүбүлүкэтин Бастакы Бэрэсидьиэнэ Михаил Ефимович Николаев төрөөбүт күнүгэр аналлаах, «Саарыннар суолларынан» бырайыак чэрчитинэн, Ф.Г. Охлопков аатынан Майа орто оскуолатыгар ураты тыыннаах көрсүһүү буолан ааста.
Бу бэлиэ күн чэрчитинэн 7–8 кылаас үөрэнээччилэригэр анаан сэргэх көрсүһүү уонна аһаҕас кэпсэтии тэрилиннэ. Тэрээһин ыалдьыта — оскуолабыт көхтөөх төрөппүтэ, тыа хаһаайыстыбатын эйгэтигэр ситиһиилээхтик үлэлиир урбаанньыт, Саха сирин биллиилээх блогерэ, оҕо суруйааччыта, саха култууратын уонна төрүт үгэстэрин тарҕатааччы, уопсастыбаннай деятель — биир дойдулаахпыт Масаха Мэхээс (Михаил Иванович Масаха) оҕолору кытары олус истиҥ, аһаҕас кэпсэтиини таһаарда.
Михаил Иванович үөрэнээччилэргэ Михаил Ефимович Николаев Өрөспүүбүлүкэбит сайдыытыгар оҥорбут сүҥкэн өҥөтүн олус тиийимтиэтик уонна өйдөнүмтүөтүк кэпсээтэ. Ону тэҥэ бэйэтин олоҕун уопутуттан холобурдаан туран, киһи олоххо миэстэтин булуутугар үөрэхтээх, билиилээх буолуу уонна идэни сөпкө талыы улахан суолталааҕын бэлиэтээтэ. Ыччакка төрөөбүт дойдуга дириҥ таптал, бэриниилээх буолуу хаһан баҕарар инники күөҥҥэ туруохтааҕын тоһоҕолоон эттэ. История уруогугар үчүгэйдик үөрэнэрбитигэр сүбэлээтэ.
Идэлэрин талар эппиэтинэстээх кэмҥэ сылдьар эдэр дьоҥҥо бу көрсүһүү улахан тирэх уонна үтүө сүбэ буолла. Оҕолор инники олохторугар эрэллээхтик хардыылыылларыгар сөптөөх хайысханы ыллылар.
Көрсүһүү түмүгэр үөрэнээччилэр интэриэһиргиир ыйытыыларын биэрдилэр. Чуолаан Михаил Иванович футболга хайдах «Заря» хамаанда5а киирбитин, блогер буолар эрдэ ба5алаах этэ дуо диэн уонна Турцияҕа олороругар туох ыарахаттары көрсүбүтүн туһунан.
Оскуолабыт аатыттан Михаил Ивановичка бириэмэтин анаан кэлэн ыалдьыттаабытыгар, оҕолорго дириҥ ис хоһоонноох, туһалаах кэпсэтиини ыыппытыгар дириҥ махталбытын тиэрдэбит! Айар уонна уопсастыбаннай үлэтигэр өссө үрдүк ситиһиилэри баҕарабыт!
Видеоҕа уһуллулар уонна суруйдулар, «Түмэн» медиа-студия корреспонденнара Эльмира Варламова, Настя Бандерова, 7а кылаас үөрэнээччилэрэ.