Биһиги, С.К. Макаров аатынан Чурапчы гимназиятын “Тумус кыһа” медиа-киин юнкордара, Тимофей Сметанин уонна Яков Стручков «Мэхээлэчээн булчут кэпсээннэрэ» кинигэлэрин аахтыбыт уонна санаабытын үллэстиэхпитин баҕарабыт.
Тимофей Сметанин уонна Яков Стручков «Мэхээлэчээн булчут кэпсээннэрэ» диэн сэһэни биһирээн аахтым. Ааҕааччы, бэйэтэ да өйдөөбөккө, кэпсээҥҥэ киирэн хаалар эбит. Кэпсээн олус кэрэхсэбиллээх, күлүүлээх, мүччүргэннээх сырыылары көрдөрөр.
«Мэхээлэчээн булчут кэпсээннэрэ» күлүүлээх эрэ буолбакка, саха норуотун омук быһыытынан сатабылын, чөллөркөй өйүн, санаатын тиэрдэр.
Кэпсээҥҥэ, үчүгэйэ диэн, сахалыы элбэхтэ туттуллубат тыллар көстөн ааһаллар, ол биһиэхэ, билиҥҥи үйэ оҕолоругар, олус туһалаах.
Хас биирдии кэпсээн киһини туохха эмит үөрэтэр. Дьон айымньыны ааҕан баран, майгынныыр түгэҥҥэ түбэстэхтэринэ, Мэхээлэчээни холобур курдук оҥостуохтарын сөп.
Сааһынан арахсыбакка, хас биирдии киһи ааҕан көрүөн наада эбит дии саныыбын.
Винея БАРАШКОВА, X кылаас
Мин «Мэхээлэчээн булчут кэпсээннэриттэн» 3 кэпсээни аахтым. Барытын сөбүлээтим, ол эрээри ордук “Эргэ балаҕан халҕанынан” кэпсээни ордордум. Мэхээлэчээн булчут кэпсээннэрэ олус интэриэһинэйдэр.
Кыра оҕолор даҕаны, улахаттар даҕаны сүргэлэрин көтөҕөр олус көрдөөх, элбэххэ үөрэтэр кэпсээннэр.
Сотору киинэтэ тахсарын олус күүтэбин. Айымньыны бары ааҕаммыт, эдэр булчуттар тустарынан умсугуйа ааҕыахха диэн ыҥырабын.
Полина ПИНИГИНА, VIII кылаас
Мин бу айымньыны олус сөбүлээтим. Мин санаабар, бэрт интэриэһинэй уонна күлүүлээх кэпсээннэр. Ол да буоллар, “Куһу ураҕаһынан да бултуурбут” айымньыга уол атаҕар маһынан биэрбиттэригэр ытаабытын аһынан ыллым.
Табаарыһыттан биир босхо куһу ылаары соруйан атаҕын ууран биэрбит дии санаатым.
Ону кытары “Эргэ балаҕан халҕанынан” кэпсээни эмиэ сөбүлээтим. Оҕолор убайдара ыксаллаах түгэҥҥэ ыгылыйан хаалбакка түргэнник толкуйдуу охсон, өйүн көмөтүнэн быыһаммыттарын долгуйа аахтым.
Мэхэлэчээн булчут хас биирдии кэпсээнэ олус интэриэһинэй. Олоххо үөрэтэр айымньылар.
Саина ЗАХАРОВА, VIII кылаас