Мин Уус-Майа оройуонун Эдьээн нэһилиэгэр төрөөбутум, улааппытым. Тус бэйэм сөбүлүүр, таптыыр хаһыатым олоҕум тухары арыаллыыр, уһун суоллаах. Оҕо сылдьан “Бэлэм буолу” ааҕан улааппытым. Хаһыат сыта, хайдах хаһыат кэлэрин күүтэрим — оҕо саас умнуллубат өйдөбүлэ. Ийэм көҕүлээһининэн хаһыакка суруйарым. Оскуолабытыгар буолар тэрээһиннэр тустарынан ахтыыны хаһыакка ыытан бэчээттэтэр этим. Бэчээккэ тахсарын наһаа да кэтэһэр, таҕыстаҕына олус дьоллонорбун өйдуубун.
Ааттыын да кэрэ – «Бэлэм буол»!
Бэлэм буол – коммунизм өрөгөйдөөх идеяларын олоххо киллэрэргэ!
Бэлэм буол – дойдугун сайыннарарга!
1985 сыллаахха Норуоттар икки ардыларынааҕы “Океан” киин лааҕырыгар путевка ылар дьолго тиксибитим. Манна актыбыыс, көхтөөх, пионерскай дружина лидердэрэ, юнкордар, үөрэхтэринэн холобур буолар оҕолор бараллара. Биhиги «Бригантина» дружина бастакы этэрээтигэр, барыта улахан оҕолор этибит. Күн аайы араас тэрээhиннэр– барыта биhиэхэ олус сонун, сэргэх буолан хас биирдиитэ ураты өйдөбүл буолан хаалбыт. Владивосток куораты көрүү, араас омук бэстибээлэ, костер, оскуолаҕа үөрэнии, арахсар бүтэhик күммүтүгэр аналлаах тэрээhин, экскурсиялар уо.д.а. кэрэ түгэн элбэх этэ.
«Океан» лааҕырга бииргэ сылдьыбыт доҕотторбун кытта сүрдээх уhуннук билсэн, суругунан суруйсар этибит. Конверт таhыгар эбэhээт «Помни Океан!» диэн логотип курдук суруйар этибит. Билигин суох, билсибэппит эрээри аныгы үйэ ситиминэн булуохпун олус баҕарабын. «Океаҥҥаа» барыбытыгар биир форма биэрбиттэрэ, күннээҕи кэтэр атын уонна параднай эмиэ туhунан буолара. Ас олус дэлэй, күн аайы фрукта бөҕө, инньэ гынан, дойдубар кэлэрбэр уhаабытым, уойбутум.
Билигин «Океан» лааҕыры көрүөхпүн олус баҕарабын. Түүлбэр билигин да, хам-тум көрөөччүбүн. Хаhан эрэ ютубка концерт булан көрбүтүм.
Океан лааҕырга сылдьыым оҕо сааhым саамай кэрэ өйдөбүлэ буоллаҕа дии, ол кэрэ өйдөбүлү тапталлаах хаһыаппар корреспанденнаабытым улахан оруоллаах. Маннык үрдүк чиэс, наҕараада оҕоҕо барытыгар бэриллибэт. Маннык бэлэх оҕону биллэн туран, бэйэтигэр өссө ирдэбиллээх, бэрээдэктээх уонна олоххо сыаллаах буолууну, төрөөбүт дойдуга тапталлаах, махталлаах буоларга кынаттыыр. “Океан” лааҕырга сылдьан, сынньанан кэлбит үөрүүбун, сонуммун биир бастакынан “Бэлэм буол” хаһыат нөҥүө үллэстибитим.
Лидия Афанасьевна Попова,
СӨ үөрэҕириитин туйгуна,
«Учууталлар учууталлара» бэлиэ хаhаайына,
«Инникигэ хардыы» НПК фонд бэтэрээнэ