Алтынньы 8-9 күннэригэр Уһук Илиннээҕи норуоттар төрүччүлэрин үөрэтэр икки күннээх форум үлэтин саҕалаата. Икки күн устата хас да сиринэн тэҥинэн араас хабааннаах тэрээһиннэр буолаллара күүтүллэр.
Ол курдук бүгүн, алтынньы 8 күнүгэр, «Россия — моя История» түмэлгэ С.И. Вахрин «Тайна якутских фамилий» кинигэтин сүрэхтэниитэ, «Уһук Илиннээҕи норуоттар төрүччүлэрин нэһилиэстибэлэрин систематизация» былаһаакка үлэтэ буолан ааста, ону таһынан Россия наукаларын Академиятын Сибиирдээҕи салаатын гуманитарнай чинчийии уонна хотугу аҕыйах ахсааннаах омуктар проблемаларын Инситутугар «Уһук Илин норуоттарын төрүччүтэ: наука уонна традициялар», СӨ Хотугу норуоттарын төрүччүлэрин уонна этнологияларын чинчийэр Институтугар «Төрүччү кинигэлэрэ» былаһааккалар күүскэ үлэлээтилэр.
Форум биир сүрүн ыытыллыбыт хайысхатынан «Мин историям дьиэбиттэн саҕаланар» былаһаакка үлэтэ буолла. «Айыы Кыһата» национальнай гимназияҕа төрүччү форум тула СӨ култууратын уонна духуобунай сайдыытын миниистэрэ Афанасий Иванович Ноев, былырыыҥҥы ааҕыылар кыттыылаахтара, оскуола оҕолоро, спикердэр, учууталлар, сэҥээрээччилэр муһуннулар, кыттыыны ыллылар. Былаһаакка иһинэн «Мин дьиэ кэргэним үйэлээх баайа» алын кылаас үөрэнээччилэригэр быыстапка күрэҕэ ыытылынна.
Бүгүҥҥү тэрээһиҥҥэ Чакыр орто оскуолатыттан Айуол Новиков (7 кыл.), Төхтүр орто оскуолатыттан Алгыс Попов (10 кыл.), Нам улуустааҕы гимназиятыттан Мичийэ Шелковникова (9 кыл.), Чыамайыкы орто оскуолатыттан Настя Романова (10 кыл.), Роберт Романов (11 кыл.), Уолба орто оскуолатыттан Устя Лазарева (7 кыл.), Алина Таппырова (11 кыл.), Дьокуускай куорат национальнай гимназиятыттан Витя Яроев кыттыыны ыллылар, бэйэлэрин үлэлэрин билиһиннэрдилэр, дьоҥҥо-сэргэҕэ кэпсээтилэр.
Маны таһынан, форум спикердэринэн Уруйдаана Юрьевна Саввинова, Иванна Ивановна Шишигина, Надежда Августовна Пермикина уонна Дмитрий Александрович Киркинский буоллулар. «Төрүччү» бырайыак, форум, төрүччүнү үөрэтэр ньымалар, бырагарааммалар, сайыннарар тэрээһиннэр тула семинар үлэтэ буолан ааста.
Ол курдук, «Кэскил» оҕо бэчээтин кыһата хаһыс да сылын ыытар оскуола оҕолоругар аналлаах «Төрүччү» научнай-практическай кэмпириэнсийэҕэ бүгүҥҥүттэн сайаапкалары хомуйан саҕаалыбытын биллэрдэ.
Төрүттээх-уустаах киһи — сиргэ бигэ тирэхтээх!
«Төрүччү» бырайыакка кыттыс!
Сиһилии видео-матырыйаалга көрүҥ:
Настя Романова, Чыамайыкы орто оскуолатын 10 кылааһын үөрэнээччитэ, «Проба Пера» эдэр кэрэспэдьиэнэ, Мэҥэ Хаҥалас