Кустуур орто оскуолатын үөрэнээччилэрэ, «Бытантай кэскилэ» түмсүү актыбыыстара Учуутал күнүгэр аналлаах тэрээһиннэри олус көхтөөхтүк тэрийдилэр.
Кэнсиэри «Биракчаан» эдкордара Стас Попов уонна Алена Лугинова, иккиэн 8 кылаас үөрэнээччилэрэ, наһаа үчүгэйдик ыыттылар. Зал толору көрөөччүнэн муһунна. Кэнсиэргэ 1-кы кылаастан саҕалаан үөрэнээччилэр бары кытыннылар. Эбээннии, аныгылыы, сахалыы «Оһуор» үҥкүүлэрин 4, 5, 11, 9, кылаас оҕолоро үҥкүүлээтилэр. Көмүс куоластаах бырааттыы-убайдыылар Егор, Святослав Слепцовтар, 8, 10 кыл., Сардана Слепцова, 9 кыл., Июлиана Неустроева кэрэ ырыалары бэлэхтээтилэр. 11 кылаастар эҕэрдэ хоһоон эттилэр. Стас Попов Майкл Джексоны үүт-үкчү үтүктэн кэнсиэри өссө эбии киэргэттэ. Элбэх ырыа, үҥкүү бу дьоро киэһэни сыананы толордо. Дьон-сэргэ сэргэхсийэн, сынньанан дьиэлэригэр тарҕастылар.
Бүгүн, алтынньы 4 күнүгэр, Кустуур орто оскуолатыгар Дублер күнэ буолан ааста. Онно оскуола дириэктэринэн Валя Червинская (11 кылаас), дириэктэри үөрэх чааһыгар солбуйааччынан Тапталыына Рожина (10 кылаас), иитэр үлэҕэ дириэктэри солбуйааччынан Альбина Другина (11 кылаас) уонна 10-11 кылаас үөрэнээччилэрэ бары учуутал оруолун толордулар. Оҕолор бары саҥа учууталлар уруоктарын болҕойон олорон иһиттилэр. Нуучча тыла уонна литературатын Наум Наумов (11 кыл.), биология — Егор Шадрин (11 кыл.), музыка — Святослав Слепцов (10 кыл.), физкультура — Дьулус Старостин (11 кыл.), физика, геометрия, алгебра — Стас Шадрин (11 кыл.), омук тыла — Вова Попов (10 кыл.), ИЗО, труд — Сардаана Слепцова (9 кыл.), Дарина Постникова (10 кыл.), Аяврина Захарова (10 кыл.) алын кылаас учууталлара буоллулар. Саамай кэрэхсэбиллээҕэ учууталларбыт 12 кылааска кэлэн үөрэммиттэрэ буолла.
Күндү учууталларбытын өссө биирдэ идэлээх бырааһынньыккытынан итиитик-истиҥник эҕэрдэлиибин!
Тапталыына Рожина, Кустуур орто оскуолатын 10 кылааһын үөрэнээччитэ, «Биракчаан» медиакиин эдкора.
keskil14.ru