Судаарыстыбаннас үбүлүөйдээх сылын бэлиэтиир тэрээһин чэрчитинэн үгэскэ кубулуйбут үтүө күммүтүгэр Амма Ытык сирдэринэн айаҥҥа туруннубут.
Ардахтаах, хаардаах күннэр быыстарыгар бу күн биһиги дьолбутугар айылҕабыт барахсан халыҥ былытын үүрэн, күөх халлаанын, күлүмнүүр күнүн көрдөрдө, ичигэс сылааһынан көрүстэ.
Бырайыак ааптардарыттан биирдэстэрэ – олохтоох энтузиаст, краевед, нэһилиэк дьокутаата Алексей Михайлович Нестерев истиҥ тылларынан эҕэрдэлээтэ, алын кылаас оҕолорун кытта тэҥҥэ сылдьыһан, Амма оройуонугар Бөтүҥҥэ бастакы уот Локомобиль кэлбитин туһунан сиһилии кэпсээтэ.
Алын кылаас оҕолоро нэһилиэк иһинээҕи ытыктанар сирдэри көрдүлэр-иһиттилэр: А.М. Васильева-Сэбиэт Аана скверигэр, Барабыыт “Локомотив”, часовняҕа, Лесопаркаҕа, Сыҥаһа алааһыгар, Кыайыы болуоссатыгар сырыттылар.
Орто уонна улахан бөлөх оҕолоро: Тыа пааркатыгар, Лөглү Бөҕө пааматынньыгар, Маҥхааһайдаах алааһыгар, Уорай хайатыгар, Хотуйа төрдүгэр (Дьаам) уонна өрүс уҥуор Кыһыл Кэккэҕэ, Хойуодуку (В.Г. Короленко) хайатыгар сырыттылар.
Оҕолор бары астына дуоһуйан, айылҕалыын алтыһан, элбэҕи билэн-көрөн, сорудахтарын толорон, видео уһулан, оонньоон, сынньанан кэллилэр. Арыаллаан илдьэ сылдьыбыт кылаас салайааччылара уонна саҥа кэлбит эдэр учууталлар эмиэ санааларын эттилэр, айылҕабытын көрөн сөхтүлэр, олус астыннылар.
Төрөөбүт дойдугун бил, үөрэт, киэн тутун!
Сайнаара Сергеева,
“Сайдам” медиа киин чилиэнэ, VIII кылаас үөрэнээччитэ, Бөтүҥ, Амма.
keskil14.ru