Дьокуускай куоракка бу өрөбүллэргэ буолан ааспыт «Боотурдар оонньууларыгар» Марха орто оскуолатын үөрэнээччилэрэ, убайдыы-бырааттыы тустуук уолаттарбыт Сергей уонна Артем Григорьевтар үрүҥ көмүс мэтээллэри ыллылар.
Балаҕан ыйын 26-28 күннэригэр «Дохсун» успуорт уораҕайыгар сылын аайы ыытыллар өрөспүүбүлүкэтээҕи көҥүл тустууга «Боотурдар оонньуулара» күүрээннээх күрэхтэһии буолан ааста. Бу улахан тэрээһиҥҥэ Саха сирин араас муннуктарыттан барыта 1439 эдэр тустуук күүстэрин тургутан күөн көрүстүлэр. Күрэхтэһии көҥүл тустууга Саха сириттэн аан дойду бастакы чөмпүйүөнүн Илларион Георгиевич Федосеев бирииһигэр ананар.
Биһиги оскуолабыттан бу улахан күрэххэ сэттэ эдэр тустуукпут кыттыыны ылла: Роберт Алексеев (8-с кылаас), Леон Федоров (7-с кылаас), Артем Григорьев, Саша Иванов, Ньургун Иванов (6-с кылаас), Сергей Григорьев (5-с кылаас) уонна Альберт Егоров (4-с кылаас). Эдэр тустууктарбытын тренердэрэ Иван Васильевич Бурнашев уонна Шамиль Георгиевич Иванов салайан илдьэ сырыттылар.
Тыҥааһыннаах киирсиилэр түмүгүнэн биһиги үөрэнээччилэрбит үрдүк ситиһиилэннилэр:
47 киилэҕэ диэри ыйааһыҥҥа 5-с кылаас үөрэнээччитэ Сергей Григорьев II миэстэни ылан, үрүҥ көмүс мэтээли хаһаанна!
52 киилэҕэ диэри ыйааһыҥҥа 6-с кылаас үөрэнээччитэ Артем Григорьев эмиэ II миэстэни ситиһэн, үрүҥ көмүс призер буолла!
Эдэр тустууктарбытыгар инникитин өссө үрдүк кыайыылары, кэлэр күрэхтэһиилэргэ өссө күүстээхтик бэлэмнэнэллэригэр баҕарабыт! Ол эбэтэр, «Эр санаалаах эргийбэт, оҥоһуулаах оҕо охтубат!».
Тренердэригэр Бурнашев Иван Васильевичка уонна Иванов Шамиль Георгиевичка кинилэр сыралаах үлэлэрин түмүгүнэн бу ситиһиилэр кэлбиттэрин иһин барҕа махталбытын тиэрдэбит!
Сахалыы өс хоһоонунан: «Кыайыы — дьулуур түмүгэ, үлэ — сайдыы төрүтэ!».
Александр Федоров, 11 кыл. үөрэнээччитэ, «Уткин сонуннара» медиакиин,
Марха орто оскуолата, Ньурба.
keskil14.ru