Ньурба оройуонун К.Д. Уткин аатынан Марха орто оскуолатын үөрэнээччилэрэ күргүөмүнэн хортуоска хостооһунугар кыттыыны ыллыбыт.
Балаҕан ыйын маҥнайгы өрөбүллэрэ хортуоска хостооһунун үгэнэ буолар. Быйыл биһиэхэ хортуоска үүнүүтэ үчүгэй. Ол курдук, нэдиэлэ саҕаланыыта үлэ-үөрэх күнүн кэннэ, сарсыарда толору үөрэнэн баран, оскуола оҕолоро уонна учууталлара буолан Андриан Николаевич Андреевка хортуоска хостооhунугар көмөлөстүбүт.
Улахан-киэҥ бааhына буолан, биир күнүнэн муҥурдамматахпыт. Аныгыс күнүгэр сарсыарда эрдэттэн эбии тэрилтэ үлэһиттэрэ көмөҕө кэлэн, күргүөмнээх үлэ өссө күүһүрбүтэ.
Үлэ кэмигэр кылаастарынан оллооҥҥо оргуйбут сылаас миининэн, итии чээйинэн минньигэс эбиэт буолбута. Бааhына тобус-толору киhи, техникэ арааhа, үлэ оргуйара — көрөргө астык этэ!
Отонноотоххо оҥоойук туолар диэн мээнэҕэ эппэттэр. Ол курдук, барыта 300-чэкэ куул хортуосканы хостоотубут. Онон үлэҕэ-үөрэххэ мэлдьи көхтөөх К.Д. Уткин аатынан Марха орто оскуолата саҥа үөрэх дьылын бу курдук саҕалаата.
Александр Федоров, 11 кылаас үөрэнээччитэ, «Уткин сонуннара» медиакиин юнкора, К.Д. Уткин аатынан Марха орто оскуолата,
Хатыҥ-Сыhыы, Ньурба