Муома улууһун Улахан Чыыстай төрүт нэһилиэгэр «Мааҕыр» ыстаада иһинэн үлэлиир «Оралчимна» сайыҥҥы оҕо лааҕырын иитиллээччилэрэ эбээн тылын, култууратын, үгэстэрин үөрэтэллэр, араас сатабыллары иҥэринэллэр. Ону оҕолоругар, сиэннэригэр тиэрдэр дьонтон биирдэстэрэ ыстаада салайааччыта, эһэлэрэ Дмитрий Христофорович Дьячков буолар.
Дмитрий Христофорович «Мааҕыр» ыстаадата үрэхтэрин аатынан ааттаммыт кыра эрдэҕиттэн аҕатын, убайдарын, эдьиийдэрин кытта тэҥҥэ сылдьыһан улааппыт сирэ буолар. Кини саамай кыралара буолан, ыстааданы салгыы сайыннарар, тутар, хаалларар улахан эппиэтинэстээх уонна билиҥҥэ диэри үлэлэтэ сылдьар. Екатерина Егоровналыын 4 оҕолоохтор, 11 сиэннээхтэр. Оҕолоро, сиэннэрэ бары үлэ-үөрэх быыһыгар сынньалаҥнарыгар куруук ыстаадаҕа кэлэллэр, илии-атах буолаллар диэн эһэлэрэ кэпсиир.
Эбээн култууратын тарҕатар сыаллаах-соруктаах лааҕырга оҕолор араас сатабылларга үөрэнэллэр. Табаны көрөргө, иитэргэ эрэ буолбакка, ону таһынан мас күөбүлүнэн оһох отторго, эт хатарарга, балыктыырга о.д.а. үөрэнэллэр.
Таба этин хатарыы — урут уруккуттан баар, бэриллэн иһэр үгэс. Маннык хатарыы олус туһалаах: буорту буолбат, минньигэс, иҥэмтиэлээх уонна доруобуйаҕа охсубат. Ыстаада дьоно элбэхтэ көһөллөр, онон илдьэ да сылдьарга олус табыгастаах. Маннык курдук туох баҕар этин хатарыахха сөп диэн Дмитрий Христофорович оҕолоругар, сиэннэригэр үөрэтэр.
Мас күөбүлүнэн (стружкалаан) оһоҕу оттор — бу хоту дьонун эмиэ биир сүрүн үгэстэрэ. Маһы итинник устуруустаан отуннахха түргэнник умайар, өр сылаас турар. Онон бу сатабылга оҕолор кыра эрдэхтэриттэн үөрэнэллэр.
Дмитрий Христофорович бэйэтин, дьиэ кэргэнин, ыстаадатын, эт хатарарга уонна маһы күөбүлүнэн отторго үөрэтэрин туһунан сиһилии видео-матырыйаалларга көрүҥ:
keskil14.ru