Оҕолоор, быйыл оҕуруоккут аһа төһө үүннэ? Дьоҥҥутугар оҕуруот аһыгар уу кутан, көрөн-харайан көмөлөстүгүт? Бу ыйытыыларга «оннук» диэн хоруйдаабыт буоллаххытына — маладьыастар! Кабачок иҥэмтиэлээх, битэмииннээх ас. Өскөтүн кабачок үүннэрбит буоллаххытына, биһигинниин кабачок рулетын буһарыаххайыҥ.
Биһиэхэ наада:
1 орто кабачок;
1 уст.сымыыт;
2 ост.ньуоска бурдук;
2 ост.ньуоска мааннай курууппа.
Барытын булкуйан, тиэстэ оҥоробут. Оһох лииһигэр фольга тэлгиибит, арыынан сотобут. Ол үрдүгэр тиэстэбитин кутабыт уонна 250 кыраадыска 15 мүнүүтэ буһарабыт.
Рулет иһигэр наада:
100 гр. халбаһы;
100 гр. сыыр;
1 уст помидор;
укуруоп;
Барытын кыра гына кырбыыбыт уонна булкуйабыт. Буспут кабачоктаах лэппиэскэбит үрдүгэр оҥорбут рулеппыт «иһин» кутабыт. Рулет курдук эрийэбит. 250 кыраадыс итии оһоххо 15 мүнүүтэ угабыт. Сойутан баран сиибит.