Мэҥэ Хаҥалас улууһун «Тумул» ТХПК ыанньыксыта Татьяна Десяткина 25-с төгүлүн ыытыллар өрөспүүбүлүкэтээҕи ыанньыксыттар күрэхтэрин кыайыылааҕынан ааттанна. Кини атырдьах ыйын 26-29 күннэригэр Владимирскай уобаласка ыытыллар XXIX Бүтүн Арассыыйатааҕы күрэххэ Саха сирин аатын көмүскүү барар буолла.
Муҥутуур кыайыылаах Татьяна Десяткина трицикл көлөнөн наҕараадаланна. Онтон тус күрэхтэһиигэ 45 саастарыгар диэри дьоҥҥо бастакы миэстэни Бүлүү улууһун «Бөтүҥ» ТХПК ыанньыксыта Василий Дмитриев ылла. Кини «Регулмото» мотоцикл хаһаайынынан буолла. Иккис миэстэни Сунтаар улууһун «Кириэстээх» ТХПК-тан Валерий Генеров ылан, мопедынан наҕараадаланна. Үһүс миэстэни Хаҥалас улууһун «Туймаада» Экоферма ХЭО ыанньыксыта Мария Саввина ылла уонна бирииһэ велосипеды тутта.
45 саастарыттан үөһэ кыттааччыларга маҥнайгы миэстэни Мэҥэ-Хаҥалас улууһун «Хорообут» ХЭО ыанньыксыта Мария Чугунова ылан, трицикл хаһаайкатынан буолла. Иккис миэстэни Хаҥалас улууһун «Бөртө» ХЭО үлэһитэ Николай Потапов ылла уонна холодильник бирииһи тутта. Үһүс миэстэни Амма улууһун «Бөтүҥ» ТХПК ыанньыксыта Мария Никитина ылла. Кини морозильнай лаарынан наҕараадаланна.
Тэрээһиннээх күрэх СӨ Тыа хаһаайыстыбатын, ас-үөл бэлиитикэтин министиэристибэтэ, «Мэҥэ Хаҥалас улууһа» муниципальнай тэриллии, Мэҥэ-Хаҥалас улууһун тыатын хаһаайыстыбатын салалтата тэрийиитинэн уонна Саха сирин меценаттарын, хаһаайыстыбаларын көмөтүнэн, өйөбүлүнэн ааста.
СӨ Тыа хаһаайыстыбатын, ас-үөл бэлиитикэтин миниистирин солбуйааччы Сахаяна Павлованы көрсөн, ыччаты тыа хаһаайыстыбатыгар аҕалар, сыһыарар туох бырагыраамалар баалларын туоһуластыбыт.
— Билигин «Кадры в АПК» национальнай федеральнай улахан бырайыак баар. Ол чэрчитинэн ыччаты сыһыарарга быйыл АГАТУ иһинэн 60 устудьуону тыа хаһаайстыбатын оҥорон таһаарар хаҺаайстыбаларга сыһыаран практикаҕа ыытаталаатыбыт. Ону таһынан атын оҕолор эмиэ бараллар. Бу оҕолор бу бырагыраамаҕа киирэн, хамнастара 60 тыһ. солк. тахсар. Үчүгэйэ диэн федеральнай бырайыак 90% ороскуотун сабар. Ол аата хаһаайыстыба 60 тыһ. солк. устудьуоҥҥа төлүүр буоллаҕына, 54 тыһ. солк. федеральный бырайыак уйунар. Маны таһынан 37 сыл устата агро хайысхалаах оскуолалар үлэллээн кэллилэр. Билигин агро-кылаас киирэн, Сахабыт сиригэр быйыл аан бастакы федеральнай национальнай төрүккэ киирэммит, үс агро-оскуола тэрилиннэ: Мэҥэ Хаҥаласка Баатыра оскуолата, Хаҥаласка Дьөппөн оскуолата уонна Дириҥ оскуолата. Бу оскуолалар алта агро-кылаас арыйаары тураллар. Онтон өрөспүүбүлүкэ үрдүнэн 2030 сылга диэри 360 агро-кылаас арыллыахтаах, — диэн кэпсиир Сахаяна Афанасьевна Павлова, миниистир солбуйааччыта.
Сахаяна Афанасьевнаны кытары толору интервьюну видеоҕа көрүҥ:
От ыйын 24-25 күннэригэр Мэҥэ-Хаҥалас улууһун Төхтүрүгэр Моҕоллой сайылыкка өрөспүүбүлүкэтээҕи ыанньыксыттар күрэхтэрэ ыытылынна. 25-с төгүлүн ыытыллар Саха сирин тыатын хаһаайыстыбатын үлэһиттэрин сомоҕолуур бэлиэ тэрээһин XX үйэ ыанньыксыт-рекордсмена Павел Шарин үбүлүөйдээх 70 сааһыy көрсө уонна биирдии ынаҕыттан 6000 киилэ үүтү ыан чаҕылхай рекордун олохтообута 40 сылын чэрчитинэн ыытылынна.
Алгыс ПОПОВ, Сандал АФАНАСЬЕВ, Надежда СМЕТАНИНА.
Төхтүр орто оскуолатын эдкордара, Мэҥэ Хаҥалас.
keskil14.ru