Өлөөкө Күөл орто оскуолатын туйгун үөрэнээччитэ, 2024, 2025 үөрэх дьылларыгар оскуола бэрэсидьиэнэ, 2025 с. Ил Дархан Харыйатын кыттыылааҕа, Г.Г. Софронов аатынан Өлөөкө-Күөл орто оскуолатын выпускнигар сылын аайы ананар 5 стипендияттан түөрт стипендия хаһаайката, Орто Халыма улууһун оскуоланы бүтэрээччилэригэр ананар «Общественное признание» анал аат хаһаайына Арина Винокурова суруйар.
Мин аатым Арина Винокурова, Өлөөкө-Күөл орто оскуолатын 2025 сыллаах выпускнигабын.
11 сыл олус түргэнник биллибэккэ, элбэх умнуллубат түгэннэрдээх ааста. Тоҕо диэтэр, мин санаабар, үөрэнэрим таһынан, аччаабыта 2-3 дьарыктаах буолар этим. Ол курдук, оскуола олоҕор көхтөөх кыттыыны ыларым. Маннык актыбыыс үөрэннээччи буолар диэн, бастатан туран, олус интэриэһинэй уонна бэһиэлэй. Иккиһинэн, киһи инники олоҕор улахан оруолу оонньуур: кыбыстарыҥ сүтэр, эппиэтинэстээх буолаҕын уонна олох ыйытыыларыгар эппиэти холкутук булар кыахтанаҕын дии саныыбын.
Онно сүрүн өйөбүлү уурбут дьоннорум — мин дьиэ кэргэним буолар. Ийэлэх аҕабар инники сыалларбын уонна былааннарбын үллэһиннэхпинэ, куруук сүбэ биэрэн өйүүллэр уонна эрэнэллэр. Дьоннорум иитиилэрэ мин олохпор сүрүн оруолу оонньуур дии саныыбын.
Ситиһии биир улахан төрдө — туруоруммут сыалгын толоруу. Иккиһэ — кыраҕа-кырдьаҕаска биир тэҥ сыһыан — убаастабыл. Мин санаабар, ханнык баҕарар оҕо кыһалыннаҕына, үөрэнэрин таптаатаҕына уонна туруоруммут сыалын толоро үөрэннэҕинэ, элбэҕи ситиһэр. Хас биирдии оҕо бэйэтин суолун, интэриэһин буллаҕына, кыра да, улахан да дабайыылары дабайар кыахтаах, ол барыта бэйэтиттэн эрэ тутулуктаах.
Мин 10-11 кылааска оскуола бэрэсидьиэнинэн талыллан ұлэлээтим. Оҕолору кытта, миниистирдэрбинээн, иккис дьиэбитин, оскуоланы, салайдыбыт. Үөрэммит оскуолабар уонна учууталларбар махталым муҥура суох. Оҕо үөрэхтээх буолан тахсарыгар үөрэммит оскуолата уонна учууталлара сүрүн оруолу онньууллар. Мин үөрэммит оскуолабар араас көрдөөх-нардаах, туһалаах тэрээһиннэр элбэхтэ ыытыллаллар. Оҕо үтүө киһи буолан тахсарыгар үтүө үлэлэр ыытыллаллар. Ол барыта хас биирдии оҕоҕо олус туһалаах, сайыннарар, иитэр-үөрэтэр сыаллаах. Оҕо мантан элбэҕи билэр, истэр, көрөр, сайдар. Биһиги хайаан да учууталларбытын, оскуолабытын, дойдубутун үтүөтүк ааттатар дьон буолуохпут.
Арина Винокурова, Өлөөкө Күөл орто оскуолатын 2025 сыллааҕы бүтэрээччи.
keskil14.ru