Когнитивнай лингвистика ньымалара билиҥҥи кэмҥэ идэтийбит киэҥ эйгэҕэ киэҥник туһаныллаллар уонна дьон өйүгэр-санаатыгар сабыдыаллыыллар.
Саха сиринээҕи чинчийэр оскуола аҕыс бырайыагыттан биирдэстэрэ тыл наукатыгар — лингвистикаҕа олоҕурбут бырайыак буолар. Манна эдэр чинчийээччилэр угуйук (реклама) тылын үөрэтэллэр, ырыталлар.
«Лингвокогнитивный анализ рекламных текстов» бырайыагы тьютор Валерия Сергеевна Борисова, ХИФУ «Арктика лингвистическай экологиятын» лабораториятын научнай сотруднига сүрүннүүр.
— Бырайыакпыт суолтата чинчийэр оскуола кыттааччыларын гуманитарнай наука биир саҥа хайысхатынан — когнитивнай лингвистиканы кытта билиһиннэрии буолар. Сыала-соруга угуйук тиэкистэрин, тыл дьайыытын араас ньымаларын үөрэтээһин уонна чинчийээһин буолар. Оҕолор дьоҥҥо араас ис хоһоонноох угуйук (реклама) хайдах дьайарын үөрэтиэхтэрэ, чинчийиилэри ыытыахтара. Ону таһынан, чинчийии түмүгэр олоҕуран, ордук чаҕылхай, дьон өйүгэр-санаатыгар дьайар ньымалары туттан, дьон болҕомтотун тардар угуйук слоганнарын толкуйдуохтаахтар. Бу инникитин аҥардас билим өттүгэр эрэ буолбакка, сахалыы угуйук сайдарыгар, элбииригэр, табыгастаах ньымалары туттуу хайысхаларын оҥорорго көмөлөһүөн сөп. Биһиги бу тиэмэни талыахпыт иннинэ өр толкуйдаабыппыт, оҕолорго ханнык тиэмэ ордук интэриэһинэй уонна чугас буолуон сөбүн уонна түмүгэр угуйук слоганнарын ырытыы ордук оҕолор болҕомтолорун тардыа диэн түмүккэ кэлбиппит.
Алеша Федоров, Үөһээ Дьааҥы орто оскуолатын 9 кылааһын үөрэнээччитэ:
— Мин ордук тыл өттүгэр чугаспын уонна тылы үөрэтиини ордук ордоробун. Бырайыакка реклама тиэкистэрин чинчийиэхпит уонна киһиэхэ хайдах дьайарын билиэхпит. ЯМИШ оскуолатыгар кэлэммин наһаа үөрдүм, олус сөбүлээтим.
Гриан Сидоров, Бэрдьигэстээх гимназиятын 9 кылааһын үөрэнээччитэ:
— Гуманитарий буоламмын уонна сахам тылын үөрэтээри, чинчийээри бу бырайыакка суруттарбытым. ЯМИШ сменатыгар аан бастакытын сылдьабын, бу маннык бырайыактарга уонна кэлэктиибинэн үлэни ордоробун.
Карина СИВЦЕВА,
Ф.Г. Охлопков аатынан Майа орто оскуолатын 8 кылааһын үөрэнээччитэ.
«Кэскил» оҕо пресс-киинин эдкора.
keskil14.ru