Үөрэх сайдыы суолун туппут, талыы-талба хонуулаах, улуу суруйааччылар дойдуларыгар Тааттаҕа күрэс төрүт көрүҥнэригэр XXII «Манчаары оонньууларын» көрсө үгүс тутуу ыытыллыбытын бары иһиттибит, көрдүбүт.
Өр сылларга былааннаммыт, биир улахан тутуунан А.Е. Мординов аатынан Таатта лиссиэйэ буолар. Мин «Манчаары оонньууларыгар» оҕо пресс-киинигэр үлэлии сылдьаммын лиссиэй дириэктэрин Изабелла Александровна Сивцеваны көрсөн кэпсэттим.
– Биһиги лиссиэйбит тутуллуута «Манчаары оонньууларын» кытта быһаччы сибээстээх. Тутуу бырайыагын 2020 сыллаахха көмүскээбиппит. «Манчаары оонньууларыгар» туох тутуулары ыытабытый диэн оччолорго улуус баһылыга Михаил Михайлович Соров саҕалаабыта. Маннык улахан тэрээһин ыытылларын мүлчү туппакка, Таатта лиссиэйин тутуутун киллэрбиппит. 2022 сыллаахха Арассыыйа премьер-миниистирэ Михаил Мишустин Саха сиригэр кэлэ сырыттаҕына, Ил Дархаммыт Айсен Сергеевич Николаев лиссиэй тутуутун өйүүрүгэр көрдөспүтэ. Ол көрдөһүүнү Арассыыйа Бырабыыталыстыбатын бэрэссэдээтэлэ Михаил Мишустин өйөөн, үлэҕэ ылан 450 миэстэлээх лиссиэй уонна 100 миэстэлээх интэринээт тутуллар буолбута. Онон 2023 сыллаахха бастакы сыбаайатын үөрүүлээх быһыыга-майгыга түһэрбиппит. 2024 сыл ахсынньы 27 күнүгэр Ил Дархаммыт Айсен Сергеевич Николаевы кытта лиссиэйбитин үөрүүлээхтик арыйбыппыт. 2025 сыл тохсунньу 13 күнүттэн саҥа лиссиэйбитигэр үөрэнэн саҕалаабыппыт. Бу биһиэхэ барбытыгар олус кэтэһиилээх, күүтүүлээх тутуу буолар, – диэн лиссиэй дириэктэрэ Изабелла Александровна кэпсиир.
Таатта лиссиэйэ саха бастакы бөлүһүөгэ, профессор, Саха государственнай университетын бастакы ректора Авксентий Егорович Мординов аатын сүгэр.
– Биһиги оскуолабыт бастаан гимназия этэ. Онтон лиссиэй диэн арыллыбыта. Онон икки үөрэх кыһалара холбоһон, этэргэ дылы, күүһэ-кыаҕа икки төгүл улааппыта. Аны бу тутуллубут миэстэтигэр урут Ытык Күөл орто оскуолата турбут эбит. Инньэ гынан Ытык Күөл оскуолаларын бүтүннүүтүн холбообут оскуола курдук буолан тахсар. Элбэх киһи «бу мин үөрэммит оскуолам» диэбитинэн үөрэ-көтө киирэн кэлэллэр. Аны бу улахан тутуу оройуоммут оччотооҕу салайааччыта Василий Хрисанфович Кашкинтан саҕалаан үлэлээн кэлбит баһылыктар бары туруорсан, Михаил Михайлович Соров баһылыктыырын саҕана тутуу бырайыагар илии баттанар, салгыы билиҥҥи баһылыкпыт Айаал Семенович Бурцев үлэҕэ киллэрдэ. Итинник ситимнэнэн, салҕанан, Таатта лиссиэйэ үлэҕэ киирдэ. Онон бу үгүс көлүөнэ күүһүн түмпүт оскуолата буолар, – диэн кэпсээтэ Изабелла Александровна Сивцева.
Кырдьык, бу олус улахан тутуу. Киэҥ-куоҥ, барыта уу сахалыы суруктаах-бичиктээх, наһаа тупсаҕай. Киһи астына көрөр оскуолата. Таатта лиссиэйэ «Манчаары оонньууларын» ыытыыга биир сүрүн сиринэн буолла.
Изабелла Александровна эппитин курдук, манна Дьокуускай куорат 111, Горнай 90-тан тахса, Амма 89 киһилээх хамаандалара олордулар. Онно эбии – судьуйалар, тэрийээччилэр, бочуоттаах ыалдьыттар, иһитиннэрэр-биллэрэр эйгэ үлэһиттэрэ. Онон Таатта лиссиэйэ «Манчаары оонньууларыгар» уопсайа 661 киһини түһэрдэ, тото-хана аһатта-сиэттэ. Ол иһигэр, биһиги, «Кэскил» оҕо пресс-киинин эдэр кэрэспэдьиэннэрэ баарбыт.
Манна түһэн, хонон-өрөөн ааспыт ыалдьыттар санааларын ыйыталстым.
Мичил Кириллин, Горнай улууһун хамаандата:
– Мин хабылык, хаамыска көрүҥэр кытта кэллим. Саҥа тутуллубут Таатта лиссиэйэ бэртээхэй тутуу эбит. Улахана, киэҥэ, ырааһа, сырдыга. Тус бэйэм минньигэс астарын сөбүлээтим. Маннык үчүгэй баараҕай оҥоһуулаах лиссиэй үлэһиттэригэр истиҥник көрсүбүттэригэр махтанабын.
Валентин Васильев, Дьокуускай куорат хамаандата:
– Мин сахалыы ыстаҥаҕа кытта сылдьабын. Оскуола олус киэҥ, улахан. Үөрэнэргэ олус табыгастаах. «Манчаары оонььууларын» Таатта лиссиэйигэр ыалдьыттаан, хонон ааспыппын умнуом суоҕа. Оскуола кэлэктиибигэр махтанабын.
Мерсиаз Пахомов, Амма улууһун хамаандата:
– Мин мас тардыһыыга кытта сылдьабын. Лиссиэй олус киэҥ, кэрэ көстүүлээх. Кэлбитим хас да хонно да син биир мунабын. Улахана, киэҥэ бэрт. Тааттаҕа 1999 сыллаахха ыытыллбыт «Манчаары ооньууларыгар» кэлэ сылдьыбытым. Ол сылтан ыла Ытык Күөл олус уларыйбыт, тупсубут.
Янис СЫСОЛЯТИН, VIII кылаас, Лөгөй лиссиэй-интэринээт, Уус Алдан,
«Кэскил» оҕо пресс-киинин эдэр кэрэспэдьиэнэ