Бары долгуйа күүппүт XXII-с «Манчаары оонньууларын» үөрүүлээх арыллыытын түмүктүүр сиэринэн-туомунан кутаа уоту уматыы буолла.
Быйылгы оонньуулар кутаа уота Баһылай Манчаары төрөөбүт алааһыттан Мэҥэ Хаҥаластан саҕаламмыта уонна Чурапчы, Дьокуускай хайысханан Ытык Таатта сиригэр-уотугар үктэннэ. «Манчаары оонньууларын» уотун эстафетатыгар сүүрбүт күрэсчиттэр: Екатерина Драгунова, Владимир Тордуянов, Владимир Находкин, Александра Мохначевская уонна Валентина Доргуева аал уоту стадиоҥҥа үөрүүлээх быһыыга-майгыга киллэрдилэр, чиэстээхтик Таатта уонна бүтүн Саха сирин ааттатар өрөспүүбүлүкэбит биллэр күрэсчиттэригэр туттардылар.
Ол курдук, уоту тутан сүүрүүнү Таатта улууһун Баайаҕа нэһилиэгиттэн төрүттээх мас тардыһыыга успуорт маастара, Арассыыйа икки төгүллээх кыайыылааҕа, «Манчаары оонньууларын» уонна аан дойду муҥутуур кыайыылааҕа Константин Жирков саҕалаата. Салгыы Тааттатын улууһугар саамай элбэх мэтээли аҕалбыт күрэсчит, атах оонньууларыгар уонна хотугу хомуур күрэскэ успуорт маастара Андрей Тарабукин, ох саанан ытыыга Бүлүү улууһун хомуур хамаандатын чилиэнэ, физкультура учуутала, чэпчэки атлетикаҕа тренер Клара Спиридонова, Таатта улууһуттан төрүттээх, күрэс бэтэрээнэ, 1993 сыллаах «Манчаары оонньууларын» гиирэ анньыытыгар кыайыылаах Наум Сенькин, Хаҥалас улууһуттан төрүттээх гиирэ анньыытыгар аан дойду кубогын кыайыылааҕа Никандр Тимофеев, Бүлүү улууһуттан төрүттээх хабылык, хаамыска оонньуутугар бастыҥ оонньооччу Андрей Захаров, Таатта улууһуттан төрүттээх мас тардыһыыга аан дойду икки төгүллээх муҥутуур кыайыылааҕа Туйаара Орлова, Таатта улууһуттан төрүттээх «Манчаары оонньууларын» икки төгүллээх муҥутуур кыайыылааҕа Николай Матаннанов, Горнай улууһуттан төрүттээх ырааҕы ыстаныыга успуорт маастара Кай Адамов, Таатта улууһуттан төрүттээх күрэс бэтэрээнэ, Саха сирин экс-рекордсмена Евгений Иванов уоту тутан сүүрүү эстафетатыгар кыттыыны ыллылар.
Оттон быйылгы күрэс төрүт көрүҥнэригэр XXII-с «Манчаары оонньууларын» уотун Таатта улууһуттан төрүттээх хапсаҕайга Саха сирин успуордун маастара Игнат Андросов уматта.
Күрэс төрүт көрүҥнэригэр XXII-с «Манчаары оонньууларын» уота умайда! XXII-с «Манчаары оонньуулара» саҕаланна!
Александра Иванова, 9 кылаас, Дүллүкү, Үөһээ Бүлүү,
Мария Сибирякова хаартыскаҕа түһэриитэ, 11 кылаас, Чурапчы, «Кэскил» оҕо медиа киинин эдэр кэрэспэдьиэнэ