Уус Алдан улууһун Мүрү 2 №-дээх орто оскуолатын Х кылааһын үөрэнээччитэ Саина Егорова быйыл Таатта улууһугар ыытыллар XXII “Манчаары оонньууларыгар” национальнай многоборьеҕа кыттыыны ылыаҕа. Бу күннэргэ Саинаны кытта кэпсэттим.
– Национальнай многоборье спорт көрүҥүн туһунан билиһиннэриэҥ дуо?
– Национальнай многоборье киһи ис санаатын күүһүн, кыаҕын, тулуурун көрдөрөр спорт көрүҥэ буолар. “Манчаары оонньууларыгар” национальнай многоборьеҕа үс көрүҥҥэ – үс төгүл үс, тутум эргиир, сүүрүү – кыттыыны ылабын.
– XXII “Манчаары оонньууларыгар” кыттарга ким көҕүлээбитэй?
– Саха сирин спордун улахан түһүлгэтигэр кыттар баҕа санаалаах этим. Ол баҕа санаабын толорон, «Манчаары оонньууларыгар» кыттар путевканы ситиспитим. Тренерим Иван Иванович Иванов.
– Бэлэмнэнии хайдах баран иһэрий?
– “Манчаары оонньуулара” күнтэн күн чугаһаан иһэллэр. Билиҥҥи туругунан бэлэмим үчүгэй диэхпин сөп. Тренерым Иван Иванович эт-хаан, күүс-уох эрэ өттүнэн буолбакка, өй-санаа өттүнэн, ис туругу күүһүрдэргэ элбэхтик сүбэлиир-амалыыр. Урут улахан күрэхтэһиилэргэ кыттарбыттан куттанар курдук этим. Тренерым сүбэтин, кини тылын-өһүн истэммин, билигин туохтан даҕаны куттаммакка иннин диэки баран иһэбин. Онон тренербэр махтанабын. Маны таһынан миигин өйүүр чугас дьоммор – эбэбэр Мария Михайловна Слатенюкка, эһэбэр Андрей Семенович Ермолаевка, эдьиийбэр Күннэй Ермолаеваҕа, убайбар Дмитрий Григорьевка улахан махталбын тиэрдэбин.
– Саина, спортка ситиһиилэрин ханныктарый?
– Кыра эрдэхпиттэн сүүрүүнэн, волейболунан, баскетболунан, мас тардыһыынан онтон да атын спорт көрүҥнэринэн дьарыктанар буоламмын, спорду кытта ыкса сибээстээхпин. Ити көрүҥнэргэ элбэх ситиһиилэрдээхпин.
– XXII “Манчаары оонньууларыттан” тугу күүтэҕин?
– Үрдүк ситиһиилэри, кыайыыны-хотууну.
Туйаара МАМОНТОВА, XXII “Манчаары оонньууларын”
оҕо пресс киинин юнкора, М.Н. Готовцев аатынан Танда орто оскуолата, Уус Алдан