«Спортивные якутяне» Саха сирин үөрэнээччилэрин спартакиадатын номнуо 4 күнэ. Кыттааччылар бары туох баар күүстэрин-уохтарын, бэлэмнэри ууран туран күрэхтэстилэр.Улуустарын таһымыгар уһун кэм устата дьаныардаах, тулуурдаах, сүүмэрдиир күрэхтэри ааһан күн бүгүн Туймаада киэҥ хочотугар кыайыылаахтар, кыахтаахтар мустан ким бастыҥын быһаарыстылар.
Н.Н. Тарскай аатынан стадиоҥҥа бүгүн иккис күнүн чэпчэки атлетика көрүҥэр түргэттэр, быһыйдар, сымсалар күөн көрүстүлэр. Чэпчэки атлетикаҕа икки күн устата уопсайа 321 (158 уол, 163 кыыс) эдэр спортсмен кыттыыны ылла. Бүгүн үрдүгү, уһуну ыстаныылар, үс төгүл ыстаныы, 200 м. 800 м. 3000 м. түмүктүүр сүүрүүлэр, 4000 м. мэһэйдэрдээх сүүрүүлэр буоллулар. Ол курдук, 200 м. сүүрүүгэ Дьокуускайтан Сайаана Брызгалова (27,41) кыайыылаах аатын сүктэ.Уолаттарга эмиэ Дьокуускайтан Максим Николаев эрэллэээхтик кыайда (24,05).
3000 м. сүүрүүгэ уолаттарга 1 миэстэ — Жирков Вениамин, Дьокуускай; 2 миэстэ — Березкин Виталий, Дьокуускай; 3 миэстэ — Кривошапкин Георгий, Чурапчы. Кыргыттарга 1 миэстэ — Шароборина Милена, Амма; 2 миэстэ — Платонова Вероника, 3 миэстэ — Домотова Ивалина.
Уһуну ыстаныыга уолаттарга 1 миэстэни Дьокуускайтан Винокуров Альберт, 2 миэстэни Намтан Барашков Лев, 2 миэстэни Лазарев Айаан ыллылар. Кыргыттарга: 1 миэстэ —Тумакова Маргарита, Дьокуускай миэстэ; 2 миэстэ — Куть Ксения, Дьокуускай, 3 миэстэ — Жильцова Анна, Мииринэй.
Быйыл чэпчэки атлетикаҕа саҥа сонун дисциплина — спортивнай хаамыы (спортивная ходьба) киирдэ. Эдэр спортсменнар 3000 миэтирэҕэ кыргыттар 12, уолаттар 11 буолан күрэхтэстилэр. Бу саҥа көрүҥҥэ кыргыттарга Амматтан сылдьар саамай кыра саастаах, 5 кылаас үөрэнээччитэ Шараборина Милена кыайыы өрөгөйүн биллэ. Спортивнай хаамыы тренера, Арассыыйа спордун маастара Степанов Сергей Евгеньевич спортивнай хаамыыны Саха сиригэр сайыннаран эрэбит диэн бэлиэтээтэ:
— «Өрөспүүбүлүкэ спартакиадатыгар спортивнай хаамыы улахан дьоҥҥо киирбитэ. Аныгыскы сыалбыт — бу көрүҥү «Азия оҕолорун» оонньууларыгар киллэриэхтээхпит. Өскөтүн сүүрүүгэ тобук токуруйар буоллаҕына бу көрүҥҥэ тобук көнө буолуохтаах. Сорох оҕолор хасыһын да кытталлар. Өрөспүүбүлүкэ кыайыылаахтара да бааллар. Оҕолор 3 км. Бастакыларын хаамтылар. Сунтаар, Амма уонна Уус Алдан кыргыттара чаҕылхай киирсиилэри көрдүлэр. Саамай кыра саастаах кыыс техниката уонна тактиката үчүгэй буолан бастаата».
Чэпчэки атлетикаҕа биир сүрүн болҕомтону тардар көрүҥ эстафета буолар. Хас биирдии улуус бэйэтин хамаандатыгар ыһыы-хаһыы бөҕөнү түһэрдилэр. Хамаандалар утуу-субуу бэрт тыҥааһыннаахтык, ыһыы-хаһыы арыаллаах илин-кэлин түсүһэн, түмүккэ кыайыылаахтарынан таҕыстылар: уолаттарга 1 миэстэ — Дьокуускай хамаандата, 2 миэстэ — Бүлүү хамаандата, 3 миэстэ— Чурапч хамаандата. Кыргыттарга 1 миэстэ — Хаҥалас хамаандата, 2 миэстэ — Уус Алдан хамаандата, 3 миэстэ — Алдан хамаандата.
Бу курдук, икки күнү быһа эдэр спортсменнар чаҕылайхай киирсиилэри көрдөрдүлэр. Манна мустубут оҕолор хас да ый, сыл бэлэмнэммит эрчиллиилэрин, бэйэ күүстэрин холоннулар. Спартакиада оҕолор дьаныардаах, инникигэ эрэллээх, сыаллаах буолалларыгар туһаайыллар. Чөл туруктаах, чэгиэн өйдөөх-санаалаах, тургутуулары уйардыы иитиллэллэригэр олук уурар. Онон бу күрэхтэн оҕолор өссө сатабыллаах уонна ситиһиилээх буолуохатара диэн эрэнэбит!