Ыам ыйын 31 күнүгэр Өрөспүүбүлүкэтин үөрэҕириитин туйгуна, Саха Өрөспүүбүлүкэтин уонна Орто Амма нэһилиэгин «Норуот айымньытын сайдыытыгар киллэрбит кылаатын иһин» бэлиэлэр туһааннаахтара Варвара Алексеевна Парфенова Харбалаахха үлэлээбитэ уон сылын бэлиэтиир «Айымньылаах түһүлгэм — Харбалааҕым!» дьоро киэһэтэ буолан ааста.
Бу киэһэни ыраахтан-чугастан ыҥырыылаах ыалдьыттар кэлэн эҕэрдэлээтилэр, уһуйааччы быһыытынан ситиһиилээх үлэтин бэлиэтээн туран, Тааттаҕа олоҥхону толоруу сайдыытыгар дьоһуннаах үлэтин иһин барҕа махталларын тиэртилэр. Уһуйуллубут үөрэнээччилэрэ, кинилэр төрөппүттэрэ истиҥ махтал тылларынан үөрүүлээх күнү киэргэттилэр. Оҕолор эҕэрдэлэрин, махталларын истэр олус долгутуулаах буолла. Варвара Алексеевна дууһатын ууран туран, оҕолору уонна улахан дьону кытта үлэтин түмэн көрдөрөр эҕэрдэ кэнсиэр олус үрдүк таһымҥа ааста. Варвара Алексеевна айымньылаах үлэтин сыаналаан, «Таатта улууһугар култуура сайдыытыгар киллэрбит кылаатын иһин» бэлиэни дохсун ытыс тыаһынан доҕуһуоллатан туттардылар.
Харбалаах биир көхтөөх олохтооҕо, РСФСР култууратын туйгуна Изабелла Викторовна Харлампьева:
«Үтүөнү үксэтэр, кэрэни үрдэтэр амарах айылгылаах Варвара Алексеевна уон сыл ситиһии, кыайыы сиэттиһиилээх айымньылаах үлэҥ дьоро күнэ үрдүк таһымҥа бэлиэтэммитинэн эҕэрдэлиибит! Бар-дьон биһирэбилэ, махтала инникитин арыаллыы, арчылыы сылдьыахтын, өссө ситиһиилэри, кыайыылары баҕарабыт!«, — диэн Орто Амма нэһилиэгин олохтоохторун бары бастыҥ баҕа санааларын, махталларын тиэртэ.
Дьоро киэһэ иһирэх-истиҥ эҕэрдэлэрдээх остуол тула олорон, чэйдии-чэйдии кэпсэтиинэн түмүктэннэ.
Күндү Варвара Алексеевна, саха култууратын сайыннарар, итэҕэлин олохсутар кэскиллээх үлэҕэр ситиһиилэри баҕарабыт! Айар аартыгыҥ арыллан истин!
Валентина Кривошапкина, Светлана Федорова, Харбалаах, Таатта.
keskil14.ru