Оскуолабытыгар үгэскэ кубулуйбут Кыыс күнүн быйыл төрөппүттэр кэмитиэттэрэ көҕүлээн ыыппыта. Оскуолабытыгар төрдүс кылаастан 11-кэ диэри уопсайа 21 кыыс баарбыт.
Бастаан үс хамаандаҕа араарбыттара, сорудахтары биэрбиттэрэ, биирдии бүлүүдэни уонна тугу аҕалыахтаахпытын эппиттэрэ. Сүрүн сорудахпыт фотозона оҥоруута этэ.
Мин иккис хамаанда хамандыыра этим. Хата, дьүөгэбин кытта бииргэ түбэспиппит. Бары эрдэттэн сүбэлэһэн ким тугу аҕалыахтааҕын үллэстибиппит. Ол курдук мин дьиэбэр тюль бөҕөтө баарын саҥа билбитим.
Үөрэх чааһа бүппүтүн кэннэ бука бары мустаммыт тэрээһин аһыллыытыгар анаан флешмоб үҥкүүгэ бэлэмнэммиппит.
Төрөппүттэрбит биһиэхэ соһуччу минньигэс остуол тардыбыттар уонна торт бэлэмнээбит этилэр. Оскуолабыт дириэктэрин иитэр үлэҕэ собуйааччыта Анна Петровна фрукталаах йогуртовый торт оҥорон аҕалбыт этэ. Бары сөхпүппүт уонна рецебын ылбыппыт.
Онтон дьэ хамаанданан үлэ саҕаламмыта. Бары кылаастарынан үллэстэн фотозона оҥорон саҕалаан барбыппыт. Биһиги, кыргыттар, булугас өйдөөх буоламмыт туох баары барытын туһанныбыт, оскуолаҕа турар сибэккилэри, ыскаабы кытта. Хамаанда аайы бары араастык оҥорбут этилэр. Ол курдук икки чаас биллибэккэ ааспыта.
Ааҕар балаҕан сэбиэдиссэйэ Екатерина Юльевна тирамисуну дьиэтээҕи усулуобуойаҕа астыырга маастар-кылаас ыыппыта. Ону кытта биллиилээх дьахталлар туһунан викторина ыыппыта, кинигэ бөҕөтүн көрдөрбүтэ, кэпсээбитэ.
Омук тылын учуутала Светлана Ивановна уонна төрөппүт Алёна Егоровна наһаа үчүгэй макияж уонна прическа оҥоруутугар маастар-кылаас ыыппыттара. Кыргыттар үөрүүнү кытта косметичкаларын таһааран кырааскаланан барбыттара. Ким да мээнэ олорботоҕо. Светлана Ивановна манекен аҕалан Алёна Егоровналыыр хайдах түргэнник уонна кыраһыабайдык күннээҕи прическалары оҥорорго, баттаҕы билиҥҥи муоданан эрийэн көрдөрбүтэ. Салгыы аквагримынан ойулаабыттара.
Итинник киэргэнэн баран Курган булгунньахха тииийэн ньургуһуннар быыстарыгар хаартыскаҕа туспүппүт, мэниктээбиппит. Таһырдьаттан киирэн баран уһун остуол тардаммыт бары бииргэ тото-хана аһаабыппыт.
Салгыы оскуолабыт гигиенаҕа эппиэттээх үлэһитэ Изабелла Ивановна уонна акушерка Александра Ивановна кыыс оҕо гигиенатын, доруобуйатын туһунан бэсиэдэ ыыппыттара. Онтон ийэлэрбит таһырдьа оҕо эрдэҕинээҥҥи оонньууларын тэрийэн ыыппыттара. Бастаан “классики” оонньообуппут эрээри билиҥҥи оҕолор биир атахпытыгар сатаан турбат эбиппит. Ийэлэрбит соһуйбуттара. Онтон хамаанда мээчиккэ күрэхтэспиппит. Мээчик быраҕыыта буккуллан-тэккиллэн эмиэ борустуойа суох этэ. Уонна бүтэһигэр бука бары “Штандер-стоп” оонньоон баран сөбүлээбиппит. Хараҥарыар диэри оннук оонньоон астыммыппыт. Сибиэһэй салгыҥҥа оонньооботох ырааппыт эбит. Ийэлэрбит урукку оонньуулара наһаа көхтөөх уонна сүүрүүлээх-көтүүлээх эбиттэр.
Онтон киэһэ, төрөппүттэрбит тарҕаспыттарын кэннэ, оскуолабыт психолога уонна завучпут биһигини кытта хоно хаалбыттара.
Кыргыттар инникини өтө көрөр ньымалары бары да сөбүлүүбүт. Ол иһин психологпыт Туйаара Евгеньевна психология киэһэтин тэрийэн ыыппыта. Онно бары бэйэбитигэр хос аат толкуйдаабыппыт. Ол наһаа интэриэһинэй этэ эрээри сахалыы аат аҕыйах этэ. Үксэ омуктуу Сакура, Наджими уонна мультик, киинэ дьоруойдарын, ас ааттарынан ааттаммыттар этилэр. Холобур, мин Быйык диэн ааттаммытым. Ол ааппытын илдьэ сылдьан бэйэ-бэйэбитин хос аатынан ыҥырыахтаах этибит. Дьиҥнээх аатынан ыҥырбыт киһи ыстарааптанар. Ол иһин барытын өйдөөрү “Снежный ком” оонньообуппут уонна бүтэһигэр Таро картанан инникибитин өтө көрбүппүт, бэйэ-бэйэбитигэр сүбэ биэртэлээбиппит.
Салгыы ырыа уонна киинэ киэһэтэ буолбута. Абааһылаах киинэ көрөөрү гыммыппыт эрээри сибээспит мөлтөх буолан табыллыбатаҕа. Ол иһин көмпүүтэргэ бэлэм баар мультигы минньигэс ас сии-сии көрбүппүт. Киинэ кэнниттэн гитаралаах кыргыттарбытын кытта ыллаабыппыт.
Бүгүҥҥү күммүтүн баҕа санаа фейервегынан түмүктээбиппит. Хамаандаларынан фотозона уонна ийэлэрбит тэрийбит оонньууларын түмүгүнэн мин хамаандам бастаабыта. Хамаандаларга барыларыгар минньигэс бириис тиксэн үөрэн-көтөн утуйуох иннинэ чэйдээбиппит.
Суунан-тараанан баран хосторунан арахсар спальный мешоктарга утуйбуппут. Сарсыарда сэттэ чааска туран, Анна Петровна уонна Изабелла Ивановна минньигэс күөрчэҕинэн күндүлээбиттэрэ. Уонна малбытын хомунан саҥа үүммүт үөрэх күнүн саҕалаабыппыт.
Ол күн биһиги, 11-с кылаас кыргыттара, МХК уруогар умнуллубат тэрээһин туһунан видео оҥорбуппут https://t.me/keskil_media2020/16948
Ити курдук Кыыс күнэ элэс гына ааспыта. Төрөппүт кэмитиэтигэр уонна учууталларбытыгар Анна Петровнаҕа, Туйаара Евгеньевнаҕа махтанабыт. Улуу Грибоедов эппитинии, дьоллоохтор чаһыыны кэтээбэттэр.
Ангелина ДАНИЛОВА, XI кылаас,
В.И. Ленин аатынан Уолба орто оскуолата, Таатта