Чурапчыга Улуу Кыайыы 80 сылын өрө көтөҕүллүүлээхтик бэлиэтээтибит. Үгүс тэрээһиннэр ыытылыннылар.
Ыам ыйын 8 күнүгэр Кыайыы Знамята улуус дьаһалтатын дьиэтин үрдүгэр күөрэйбитэ. Бу күн сэрии кэмин оҕолоругар уонна сатаан кэлбэтэх ыалларга анаан «Автоконцерт» тэриллибитэ.
«Айылгы» норуот айымньытын дьиэтигэр «Кыайыы суолунан» диэн быыстапка арыллыбыта. Киэһэлик дьон-сэргэ сэбиэскэй суруйааччы, сценарист Лев Кассиль «У классной доски» сэһэнигэр олоҕурбут «Сырдык сарсыҥҥы туһугар» испэктээккэ (режиссер Ольга Ноева) сырыттылар.
Артыыстар итэҕэтиилээх оонньууларын астына-дуоһуйа көрдүлэр. Ону таһынан Россия үрдүнэн ыытыллар «Өйдөбүнньүк чүмэчи» аахсыйаҕа кытыннылар.
Ыам ыйын 9 күнүгэр сарсыарда дьон-сэргэ Кыайыы мемориалыгар тоҕуоруһа муһунна. Эйэлээх олоҕу түстээбит дьоннорун сырдык ааттарын үйэтитэн, долгуйан туран, сибэкки ууруу миитинигэр кытыннылар.
Онтон «Боотур Уус» стадиоҥҥа сэлэлээн хааман тиийдилэр. Оҕолор, улахан дьон эһэлэрин, эбэлэрин хаартыскаларын тутан «Өлбөт үйэлээх полкаҕа» хаамтылар. Парааты майор, сэбиэскэй-партийнай үлэ бэтэрээнэ Семен Никитин салайда.
Параат үөрүүлээх чааһыгар улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, Чурапчы нэһилиэгин баһылыга Владимир Сивцев, Саха сирин Ытык Сүбэтин бэрэссэдээтэлин солбуйааччыта Иннокентий Аммосов, хоту көһөрүллүү кыттыылааҕа Роман Михайлов Улуу Кыайыы күнүнэн эҕэрдэлээн тыл эттилэр. Ону кытары хорсун санаалаах биир дойдулаахтарбытын наҕараадалаатылар.
Чурапчы нэһилиэгин 4 оскуолатыттан 1935 үөрэнээччилэр хордара, байыаннай-патриотическай кулууп иитиллээччилэрин туруоруулара, 80 үҥкүүһүттээх Кыайыы вальса дьону-сэргэни кэрэхсэттэ. Бука барыларыгар киэн туттуу санаатын үөскэттэ.
Анаабыт курдук олус үчүгэй күн турда. Улуу Кыайыыны уһансыбыт ытык дьоммутун санаан-ахтан, кинилэр оҥорбут хорсун быһыыларыгар сүгүрүйэн, бары Кыайыы 80 сылыгар анаммыт тэрээһиҥҥэ долгуйа кытынныбыт.
Бу күн «Өлбөт үйэлээх полк» Бүтүн Арассыыйатааҕы аахсыйа кыттааччыларын кытта сэһэргэстибит https://t.me/keskil_media2020/16743
Бу курдук бу суолталаах күнү өрө көтөҕүллүүлээхтик уруйдаан-айхаллаан бэлиэтээтибит. Ким да умнуллубат, туох да умнуллубат!
Ааптар Күннэй ЭВЕРСТОВА,
Видео Алина Павлова
Корреспондент Маша Сибирякова уонна кини хаартыскаҕа түһэриилэрэ
«Тумус кыһа» медиа киин, С.К. Макаров аатынан Чурапчы гимназията