Бүгүн хаһааҥҥытааҕар да сайыҥҥылыы чаҕылхай күннээх, ыраас халлааннаах күн туран үөрүүбүтүн үксэттэ. Бүгүн сарсыарда 50-ча хаас Кыайыы паамытынньыгын үрдүнэн көтөн ааста.
Улуу Кыайыы 80 сылын көрсө Кыайыыны уһансыбыт буойуттарбытыгар махтанан, сүгүрүйэн дьон-сэргэ, оҕо-уруу өрө көтөҕүллэн Кыайыы парадыгар муһунна.
Кэриэстэбил миитиҥҥэ нэһилиэкпит баһылыга Афанасий Степанов эҕэрдэ тылын анаан, хоту көһөрүллүү кыттыылаахтарыгар, тыыл, үлэ бэтэрээннэригэр, сэрии сылын оҕолоругар Кыайыы үбүлүөйүнэй мэтээлин, эҕэрдэ суруктары, бэлэхтэри туттарда.
Чурапчы улууһун социальнай харалтатын салайааччыта Лидия Васильевна Тосукаева парад кыттыылаахтарыгар эҕэрдэ, махтал тылларын этэн туран Саха Өрөспүүбүлүлкэтин Ил Дарханын Айсен Николаев, «Чурапчы улууһа» МТ баһылыга Степан Саргыдаев эҕэрдэ суруктарын, үбүлүөйүнэй бэлиэлэрин тыыл бэтэрээннэригэр Марфа Никитинаҕа, Александра Софроноваҕа, Дмитрий Лукиҥҥа, сэрии сылын оҕотугар Ксения Игнатьеваҕа туттарда. Маны таһынан Анал байыаннай дьайыы кыттыылаахтарын дьиэ кэргэттэригэр «Чурапчы улууһа» МТ баһылыга Степан Саргыдаев, улуус депутаттарын Сэбиэтин бэрэссэдээтэлэ Яков Оконешников эҕэрдэ суруктарын, бэлэхтэрин туттарда.
Бу күн эдьиийдии-балыс, хоту көһөрүллүү кыттыылаахтарыгар, тыыл бэтэрээннэригэр, нэһилиэк бочуоттаахтарыгар Марфа Никитинаҕа, Александра Софроноваҕа улуус сайдыытыгар киллэрбит сүҥкэн кылааттарын, үтүө суобастаах үлэлэрин иһин «Чурапчы улууһун Бочуоттаах олохтооҕо» ааты иҥэрдилэр. Бочуоттаах аат иҥэриллибитин нэһилиэк дьоно уруйдаан-айхаллаан үөрэ иһиттэ. Ытык кырдьаҕастарбыт эдэр ыччакка алгыс тылларын анаатылар.
Парадка нэһилиэкпит олохтоохторо уонна оскуола оҕолоро эбэлэрин, эһэлэрин хаартыскаларын тутан пааматынньыкка диэри хаамтылар. Аҕа дойду Улуу сэриитигэр биһиги нэһилиэкпититтэн 151 киһи ыҥырыллыбыта. Биһиги кинилэри барыларын өйдүү-саныы сылдьыахпыт.
Эйэлээх олох кэлэрин туһугар ырыа, хоһоон дьиэрэйдэ, пааматынньыкка өйдөбүнньүк гирлянда, тыыннаах сибэкки уурулунна, полевой кухня үлэлээтэ, сүгүрүйүү бэлиэтинэн Кыайыы салюта буолла.
Аҕа дойду сэриитин кыттыылааҕа, 5 бойобуой уордьан кавалера С.Д. Флегонтов пааматынньыгар «Свеча памяти» акция буолла. 1-11 кылаас үөрэнээччилэрэ түмсэн, «Спасибо» диэн сурукка, төгүрүччү чүмэчилэрбитин уурдубут.
Киһи аймах историятыгар биир саамай дьулаан сэрии, Аан дойду иккис сэриитэ төһөнөн ыраах барар да, соччонон барыбытын Аҕа дойду Улуу сэриитигэр Кыайыыттан ордук сомоҕолуур суолта суоҕа чуолкайданан иһэр.
Улуу Кыайыы 80 сылын Хадаар нэһилиэгэ түмсүүлээхтик, сэргэхтик көрүстэ. Сэриигэ барбыт биир дойдулаахтарбытын ахтан-санаан, олохторун-дьаһахтарын үөрэттэхпитинэ, оччоҕо кинилэр тустарынан өйдөбүнньүк үйэлэргэ тыыннаах буолуоҕа.
Алёна КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы